當我啲朋友知道我會參加今年嘅毅行者之後，唔少人都會話「你都行完PCT，毅行者玩晒啦」，但其實毅行者同PCT，完全係兩回事，今次我就係到講下麥理浩徑嘅分別。
1. 環境與氣候
如果大家有睇我之前嘅文章，都知PCT要行沙漠雪山森林等地貌，而麥理浩徑大家都好清楚，主要都係城市近郊嘅山野，表面上PCT難度應該更高，但實際上香港潮濕嘅氣候增加左難度，降雨亦比PCT大，不過PCT因為温差大，所以要帶嘅衫較多，負重會比行麥徑重。
2. 地型
PCT極少梯級，大約九成嘅路都係斜坡，而且斜度不大，平均大約只有20度，最大都係30度左右，但麥徑上山路段有超多梯級，部分如雞公山路段梯級仲要很高，所以更考驗徒步者嘅爆發力。
不過對於唔擅於行梯級嘅我黎講，PCT上坡都係比較難，因為對我黎講，雖然麥徑上坡難度較大，但辛苦程度其實同PCT差唔多，但PCT上一個大斜坡，講緊可能要上2至3個鐘以上，而麥徑可能30分鐘就已經到頂，從忍受辛苦嘅角度黎講，PCT係比較難。
3. 路況
PCT嘅路況比大家想像中要好得多，好多路段都被修繕得好好，有啲似麥徑第十段起步環水塘個段路，泥沙地行得好舒服，但有啲火山岩路段又要非常難行，我最討厭就係行碎石地，好易扭修腳踝，腳底又俾石頭刺到好痛，好易行到生水泡。麥徑唔計石屎路的話，整體都算唔錯，但有時候明明係平地，都要有好多石頭突出黎，行起黎無咁舒服。
4. 精神壓力
如果兩者都以唔拼時間黎比較，咁當然PCT需要嘅意志力大得多，麥徑48小時全走難度并唔高，但如果PCT同拼時間嘅毅行者去比，咁兩者都需要一定意志力，但兩種意志力有啲唔同，麥徑係「幾攰幾辛苦好想放棄但都要繼續」，PCT係「幾攰幾辛苦無話想放棄但唔知出黎行為乜不如放棄但最後都係唔放棄」，論辛苦，有時間目標嘅毅行者一定辛苦過PCT，但你只需要辛苦一日半就完成，但因為PCT實在太長，當你行到中途，就會開始質疑自己嘅初衷，如果動機唔夠就好易放棄。
另外，行毅行者，係唔需要享受過程，因為就算你幾唔享受都好，兩日內必定完結，PCT一定要學識享受，不論苦與樂，都要變成正面嘅去睇，如果唔係點頂百幾日。。。
更多：
Fitz.hk Facebook專頁
[毅行者2016] 32小時感謝之旅
我的第一次毅行者100KM
[毅行者2016] 人生中最寶貴的一課
王維寶，前港聞記者、長途徒步者、順風車旅遊者。於2014年離職後，由廣州順風車5000公里到拉薩、徒步1300公里環繞臺灣一周、澳洲工作假期期間順風車遊澳、並於2016年徒步全長約4300公里的太平洋山脊步道，由墨西哥穿越美國西岸到達加拿大，為香港第一人。
