智慧在民間，行過咁多年毅行，發現唔少人都有自己一套想法，特別用啲咩物資，唔同人都有唔同嘅堅持。不過先旨聲明，呢啲物資有無用，我山雞都唔係太肯定。有用無用，大家自行斟酌啦。
1. 黃道益活絡油
我山雞無收過錢，唔係賣廣告。總之唔少人行山抽筋、扭親、跌傷，都要搽佢。據講比其他跌打油有用，又唔會引起皮膚敏感。搞到我行咗山咁多年，都會擺支喺屋企。
功效：唔……心理上都得嘅……
注意：呢隻藥油畀自由行炒到貴一貴，而且無輕便裝，要帶去行山都幾煩。
2. 一小包粗鹽
毅行者大多數只係提供清水，咁參加者其實可以自備能量飲料沖劑，或拎包粗鹽，以保充流失嘅礦物質。
功效：至少唔使飲水飲到口淡淡
----- 廣告 Ad -----
注意：粗鹽比幼鹽有益
3. 背心膠袋 x2
用嚟行經大浪西灣以及鹹田灣用，包住對腳行沙灘，對鞋就無咁易入沙。
功效：好好。
注意：又要停低著膠袋，又要記得孭兩個膠袋，我就認我懶，所以咁多年都無用過。而且要記住，用完嘅膠袋拎返市區先好揼。
背心膠袋都可以如上圖做法，去避免幼沙入鞋。
4. 必理痛
行100公里身體咩地方都有可能會痛。聽過有人行毅行者時，一路行一路食，100公里食咗一盒！(大家千祈咪學) 前題係，樂施會究竟會唔會將止痛藥列為禁藥呢？
功效：單純止痛都會有效，不過後果要自己負責。
注意：止痛藥越食越無效，而且據講過多止痛藥會積聚喺身體，對身體有害。仲有係，若果因為身體受傷而有痛楚，食咗止藥就唔知身體有問題，會越行越傷。
----- 廣告 Ad -----
編按：服用過多必理痛 [或稱撲熱息痛(Paracetamol)/乙醯氨基酚(Acetaminophen)]，會嚴重損害肝臟。國際建議的每天最高劑量是4000毫克撲熱息痛，而「特效必理痛」盒面亦注明，廿四小時內不可服多過八粒。所以，100公里食一盒必理痛，可以話係玩命，千祈唔好試。
更多資料，可參考：http://goo.gl/916oNX
聽講話特效嘅真係特效啲，除非唔係啦。
5. 藥水膠布
大會當然有醫療服務，但係你身處馬鞍山，發現自己有水泡，唔係要行到基維爾CP呀嘛？所以最簡單都係帶幾塊膠布，以備不時之需。
功效：功效其實麻麻地，不過無帶嘅話仲大鑊。
注意：我自己個習慣就會帶幾塊好大塊嘅膠布，萬一個水泡大啲都夠用。
我鍾意拎圖中咁大塊嘅藥水膠布。
6. 香口膠
用嚟提神，消除口氣之用。個人清潔（包括口腔）良好，可以令人精神百倍！
功效：一般般啦
注意：其實第二朝可安排支援隊拎牙刷牙膏畀你刷牙。
----- 廣告 Ad -----
7. 尿袋
講緊嘅係叉電話嘅尿袋。而電話嘅用處唔單口打電話求救，仲可以聽歌、影相。行咁多里路，娛樂下都好應該。
注意：考慮下背囊嘅重量，覺得個背囊重，就要犧牲下娛樂。
8. 凡士林（或運動護膚摩擦膏）
衫褲同身體磨擦太耐，會令皮膚磨損。凡士林可以保護呢啲部位。而呢啲部份，包括膊頭、腳板、大脾（內側為主），甚至係Pat Pat等。
功效：非常好
注意：
- 市面有噴霧式凡士林
- 身體會唔會磨損，其實好講衣物嘅質料。總之越貼身越好（所以時下好多人著compression），衫褲越舊越好。
Fitz Pop-up Live 「郁民埋周」，測試咗凡士林及Body Glide功效，可以睇片重溫！
9. 眼鏡
同嗰啲平時戴隱形眼鏡嘅人講。毅行至少行廿零三十個鐘，咪咁貪靚戴con呀，萬一眼痛、跌咗隻眼鏡，都咪話唔麻煩。
10. 一大包粗鹽
根據民間智慧，平時練完山周身酸痛，就可以開缸水，再放包粗鹽浸下身，行完毅行，更加要浸下
功效：就算粗鹽唔可以消除疲勞，你浸一浸熱水，個人都會舒服好多。
注意：沖浸浴比沖花灑嘥水以倍數計。
----- 廣告 Ad -----
更多：
Fitz.hk Facebook 專頁
[毅行備戰] 系列
山雞@Fitz.hk
Fitz Hiking 行山
