圖片來源: tam
毅行日逼近，而家距離起步淨返好少時間，好多生活細節，都會影響到時表現，大家要注意！
1. 剪腳甲
修剪腳甲可避免行山過度，或鞋頭太窄，而有爆甲嘅情況。不過，臨起步之前一兩日先至剪腳甲，如果剪得太入，就唔夠時間復元。理想剪腳甲嘅時間就係大概一個禮拜前，視乎大家腳甲生長嘅速度，仲有記得唔好剪到出血呀。
2. 剪頭髮
唔好太近起步日子去剪髮，男士剪髮要剃呢度剃嗰度，一剃到出血，到時毅行行幾十個鐘，啲汗水醃住你嘅傷口都咪話唔痛。
----- 廣告 Ad -----
3. 剃毛
除咗鬍鬚之外，我山雞真係諗唔到人有咩地方需要脫毛。不過，如果你真係覺得有此需要，就唔該一個禮拜前搞好啦。令皮膚有時間適應。
4. 點算必要物資
由Power gel、Power bar，以至能量飲品；由衣服鞋襪以至電筒頭燈，呢個時候應該要準備妥當。對裝備有咩疑問，一係買個新一係問朋友借，務求唔好令自己有唔踏實感覺。注意係，呢個時候千祈唔好諗住著新鞋參賽。(有人臨時臨急要換新鞋，喺最後一個禮拜，唯有叫阿媽幫手，著佢對新鞋朝朝去晨運，務求盡快開鞋。)
5. 同屋企人溝通
毅行者絕非一個人嘅事，你唔返屋企咁多日，都應該好好解釋畀你屋企人知你去咗邊。最重要係，得到屋企人支持會令自己無後顧之憂。呢幾日，就搵個時間拎份地圖，同屋企人解釋毅行者係乜，順便叫佢哋捐錢，最好就叫埋佢哋去checkpoint支援你。
6. 確立支援點
Support team應該一早搵齊，而家先嚟搵，除非你係大明星，一呼百應啦。但齊team都要同大家制訂支援點嘅地點同時間。雖則話行走毅行嘅時間好難預，但唔該都最好定個約莫時間，令支援隊朋友唔使喺山頭白等。仲有係，起步前幾日約個時間交收物資，以及定好飲食清單。
7. 積極同隊員溝通
有時間大家就培養下感情啦 (見唔到面就WhatsApp吹下水)。四個人結伴行100公里，感情差係會好難捱。
8. 飲食要小心
唔係講起步前兩日加碳飲水呢啲。而係而家呢個時候，食得清淡啲，唔好剌激腸胃。麻辣火鍋就留返行完慶功啦。
毅行．傳承
Fitz.hk為樂施毅行者2016大會媒體伙伴
----- 廣告 Ad -----
如果你亦希望為扶貧出一分力，歡迎登入Fitz Team 籌款專頁直接捐款，與我們一起助人自助，對抗貧窮！
Fitz Team 籌款專頁: tr.im/FitzOTW2016
隊伍編號： 0470
隊伍名稱：Fitz
更多:
Fitz.hk Facebook專頁
痴線，我永遠都唔會行毅行!
[Fitz出戰毅行] 整裝待發 最後衝刺!
[Fitz出戰毅行] 喜歡，就是單純去完成一件事
[毅行備戰] 系列
