估唔到100公里毅行者,不單令五千多位參加者以及佢哋嘅 supporter 有得玩。我哋對住個鍵盤,亦感受到呢份毅行嘅歡樂。

#毅行Secret 呢個活動,感激大家踴躍發言。我們將留言整理成兩篇文章,留言有新有舊,大家之前喺 Facebook 或者 IG 睇過,都值得睇多幾次。

大家熱烈嘅反應,係我哋嘅預料之外,更令我哋跌鏡嘅,原來大家都好關注飲飲食食,由基維爾燒賣,以至薯條茄汁,仲有就係花醬同煙仔餅……

#13 無名氏


行得毅行嘅男士,都知道下面搽花士令是常識吧。今次我地成隊得兩個人有帶花士令,去到cp要補搽時,大家一人一手咁搽落去,有時又唔只補一下,就好似食薯條點茄汁,咬一啖再翻點咁,個感覺真係嘔心到🤢

#32 L

大大話話喺城門做左幾年support,最多一次要 support 十隊,所以伙食黎講小弟雖然冇其他啲大隊咁識食又打邊爐又炒嘢煲飯,但都有少少心得嘅。以我經驗呢,對跑手黎講三大最受 runner 歡迎同埋最不受歡迎嘅食物大概係呢幾樣喇。

最受歡迎嘅嘢食莫過於係暖粥,仲要係好咸嘅暖粥,可以好快咁補充體力之餘仲可以補鹽同埋水份,最好係用杯裝而唔係用碗裝,runner 可以即刻 grab and go,邊跑邊啪粥,追時間必備。每年煮左三大煲粥 (共20升) 都可以俾班 runner 清晒!

其次係三文治/老麥魚柳包/豬柳包,邪覺嘅包係俾行左六十幾公里嘅 runner 有啲心靈嘅安慰,但係擺得太耐又會濕左水會好難入口,尤其慢隊分分鐘話零晨三點到點知係早上七點先到,宵夜都變左早晨全餐,所以一定要係 runne r到之前喺個燒烤爐頭前慶番熱佢,乾身少少會易入口啲。

第三樣就係雞髀喇,點解咁油又難消化嘅雞髀會係第三大歡迎呢?話說毅行隊友P每年喺城門嗰個站都要叫隻油髀,食完之後呢好似如有神助,即刻加速爆上針草帽之後一直衝番終點。之後其他嘅隊友就跟風要雞髀,差啲將荃灣嘅油髀都掃晒。

之後就到最不受 Runner 歡迎嘅三種食物喇!

最不支歡迎食物嘅第三位係薯仔/蕃薯。第二位就係飯團。最不受Runner歡迎嘅就係腐皮壽司。原本 Runner 覺得呢啲又易拎又補充到能量,但我可以冇乜邊個 runner 真係攞走,寧願食多碗粥都唔肯拎走。試過有一年食唔晒嘅地步係 supporter 食埋都剩底三十件壽司,等左成廿個鐘都俾人冷落,大家都驚會變壞逼不得已要掉低晒。

#1 M

作為一隊冇 support 既毒L隊伍,食大會係常識吧。今年八點出發,途經每個CP都只係得水同麵包。
一直期盼基圍爾有鴻x堂暖意燒賣暖暖胃,可惜,到達CP時未到六點,依然得麵包。隊友A到達崩潰邊緣,惟有到獅子亭store 坐低食野。隨後CP同加油分別有熱食同暖飲。但頭五十公里絕對係人生中伙食最差既比賽。

#3 無名氏

致某隊友,行得毅行就預左辛苦和要 team work,大家決定了休息時間,就照做吧! 毅行系4條友行,吾系公主一人下江南😔,你舖舖到大會CP就要入去打個round,去到每個朋友support 点又要嘆個3点3,”越坐越想走,的士系路口”,你估現在去左日本豪華購物團? 真系痴膠花!

#5  J

毅行答應左朋友去城門做support,我個朋友叫我帶定飽肚嘅嘢食俾佢。比賽當日,我就去麵包舖買咗個法國麵包,我四個朋友行左60公里   落到城門嘅時候   咁岩見到隔離隊同啲 supporter BBQ 大魚大肉 好開心

而佢哋就一人分條法國麵包,其中一個朋友拎起個包一野亨落我個頭,我痛到傻😭🤕
最後我右手揸住部電話順勢跌落地,成個Mon爆左,所以想問下各位巴絲邊度維修 iphone 平?

#6 G

作為 suppoting team,帶左一大堆野食上山,去完城門水塘 support,拎埋物資預備去另一個支援點,落山果時畀🙉🙈🙉馬騮們圍攻,搶左一半食物😂結果下一站隊員要食齋😃佛系 support

#9 無名氏

舊年太古喺M133嘅檔口有可樂派,令人為之一振。但今年嗰度冇得派,個站尐 staff 聲稱係大會禁止佢哋派。呢個大會自己唔提供可樂,都叫做預咗(雖則其他越野賽已經提供可樂),但禁埋人哋,就相當過份。

#28 雅典士兵

有人行到關節痛,肌肉痛,生水泡,食住止痛藥完成,得到英勇勳章,永誌難忘。我晨操晚課,練到變出色的馬仔,最後只能輕鬆完成,未酬烈士壯志,體驗掉拿馬之勢。係咪認真我就輸鳥?

#11 大食D

毅行慢腳表示CP自基圍爾營後伙食超正
1。CP4鴻福堂雞湯或者豬展湯
2。CP4無限量多豉油燒賣
3。CP5廉政公署義工隊番薯糖水熱辣辣,啱晒我呢一個番薯達人
4。CP6啲飯團睇個樣唔錯,咁放喺check point隔離任拿。烏冬可以擺前就好吧,行多200米先有得食,一啲都唔吸引到米!OTW行多2cm都嫌多
5。草山驚喜Swire熱辣辣熱狗和去皮金橘,正
6。蓮姐能量熱朱古力,飲完回神,跑快兩步去終點沖涼

#36 超級慢腳

去到基維爾營,要燒賣冇燒賣,要飲湯都無湯,只能夠坐喺鴻福堂個空空嘅攤位度等自己隊友。😞

#17 花生醬洗手

喺CP2個厠所排緊隊去放水啦,見到有位師兄衝入來,企喺果個大藍桶(通常用來裝水沖厠,但有人洗手洗面) 隔離,赤手空拳伸隻手入條褲,喺股隙間挖出一手花生醬,然後毫不猶豫,將花生醬手喺果桶水度洗!大佬呀,唔係呀化!😱😱有人趕住排唔切隊洗手有機會喺果度洗架!我反應唔切叫停佢,但跟住有人想喺果度洗手我都叫停左!come on, 有d公德心啦!跟住d CP 見到花生醬包都唔想食喇,多_謝哂!

#35 無名氏

話說上年行完針山,去到直升機站 FILL 水,FILL 完水諗住坐下等埋隊友,點知俾大會果阿叔鬧,話我坐咗佢張櫈,我望一望你仲有幾張無人坐喎。之後坐係地下等,條大叔仲叫我瞓埋係地,可慢慢瞓! 我心諗DLLM!

隊友到咗就閃人~

#18 毅行者

16/11 點幾兩點鐘上氣唔接下氣上到馬鞍坳,又凍又大霧! 都唔知邊拿個食煙,搞到一個山頭都係煙味!

好彩有個師兄出聲屌七嗰條友! 請容許我借呢個地方感謝呢位師兄!

#29 毅行忍

人玩毅行你玩毅行,人地用對腳玩,你就用對手玩,大佬,你玩少陣電話唔駛死啊,玩多陣我驚你卜死啊。我知你溝緊女,就黎可以單刀直入射埋個空門,但都睇下路啊,一陣pk睇下你仲有咩可以射。又唔知自己玩緊電話行得慢,就黎馬鞍山頂比你塞到落水浪窩,你好唔好意思㗎

#40 Ken BB 

過到30幾個鐘毅行者, 勢估唔到過唔到4個鐘既毅飲者。今晚慶功宴,每個checkpoint嘅support同陪跑都走來敬酒,我未到cp8 已經力竭筋疲, 瞓咗15分鐘再衝埋嗰臨尾兩個checkpoint,好乸辛苦。最後响終點要掛住個安全嘔吐袋返屋企。

(待續……下篇有女神、有老細、仲有翼龍!)

Fitz連結: https://fitz.hk/?p=108264


更多:
Fitz Facebook專頁
[樂施毅行者2018] 人人都是毅行者 成績總結
毅行慢腳 被遺下的靈魂
Fitz 行山 Hiking

廣告
Fitz
我哋坐唔定、無時停,唔做運動唔舒服! 只要係有用知識、重要資訊,以至好玩話題,Fitz都會全力搜羅,同時鼓勵「郁民」齊齊參與,打造一個開放嘅運動生活資訊平台。