[每個人心中有座山] 香港大峽谷 菠蘿山

 

菠蘿山？青山？香港峽谷？有人話其實峽谷位置唔係屬於菠蘿山，我亦冇去認真查清楚，不過大部人都當菠蘿山就係呢個峽谷，而且見到越黎越多人去朝聖，去睇下所謂既香港大峽谷，今日就同大家介紹下。

路線容易行而且所需時間亦都好短，我行過2條唔同路線，其實2條都差唔多，睇自己個人需求。最大眾化既路線就係係屯門良景村基良小學後面沿石屎路上，雖然係普通石屎路但其實都幾斜。

行大約30-40分鐘（視乎速度），路況開始變平，就代表已經到良田坳了，向後望會見到青山發射站，再行多10分鐘左右就會見到一個好大既警告牌攔路。

唔洗一個鐘就到左峽谷位，係香港見到呢種景色都算幾特別。
影完相繼續向前行，過左石屎路後沿路都係沙石路，慢慢降落，行20分鐘左右已經落到去，會見到一個軍事禁區既牌，之後轉入石屎路向左行。

又係大約行20-30分鐘左右，就去到下白泥，撞岩時間可以睇埋日落先走，沿馬路繼續行返出去，去到白泥村村公所有村巴可以搭返出元朗。

路線2
至於另一條路線？其實係入到去下白泥，行去軍事禁區牌再行上去，然後沿路落返黎。邊條易行d？我覺得第2條易行d，只係交通唔方便，但起碼可以避左一開始良景去良田坳果段斜路，我上次想去影日落，7點幾先落山，行左5分鐘突然好多野飛上身，成面成身都係飛蟻，即刻跑落山，上到車發現自己成身同個袋都係半死既飛蟻，最後仲唔小心帶左幾隻返屋企添，自此發誓以後唔會再上菠蘿山。

(按：出發前請先評估自身體力、裝備、經驗及天氣。)

Ko Facebook專頁

更多：
Fitz.hk Facebook專頁
[每個人心中有座山] 行極都未行完 大刀屻
[每個人心中有座山] 香港之巔大帽山
[行完食餐好] 5大海鮮團行山路線
[全港郊遊渡輪班次] 行山郊遊唔少得 (下)
Fitz Hiking 行山