4月20日朝早仲未有雨

以下呢個係我山雞朋友嘅真實經歷,應朋友所求,將佢呢一段經歷轉載出嚟。

「我們一班朋友一早計劃好喺復活節期間嘅星期六 (4月20日),行一條好長好長嘅路線,因為呢次真係好難得湊夠人,所以我們都落做功夫做準備。見上星期四落過大雨,澳門對出海面中有龍捲風,仲以為要取消行程,但第二日 (星期五) 見到天氣又好番好多,天文台又預測當日嘅天氣係間中有陽光,咁就梗係 Go Go Go啦!

星期六朝早,大家準時喺陽光之下出發。嗰朝早,亦留意到天文台有間有雷暴,所以有隊友亦定時留時天氣圖,如果勢色唔對就切碎走人。可惜,我哋嘅應變始終唔夠個天快。未到中午,已經風雲色變,開始落雨。突然之間黑雲籠罩大地,天色黑到要開電筒先睇到路。到我哋意識到要掉頭時,我哋距離山頂只幾百米。我哋唯有邊行邊搵遮檔,沿住變成一條河嘅山徑慢慢落山。」

下午1點雨雲已殺到香港 (圖: 廣東氣象)

事實上,上星期六嗰場突如期來嘅紅雨,真係令唔少山友中晒招,雷暴甚至令人一位山友不幸身亡,因為暴雨來臨正值中午,好多行山隊伍都喺山野途中,就好似我朋友咁,行到唔上唔落,嗰陣遇上大雨更加危險。

事後,有傳媒及山友指責天文台,話佢哋嘅預測好唔準確。不過古語有云:「天有不測之風雲。」天氣突變,我山雞就唔會將個問題怪責天文台。反而,值得思考一個問題,就係行山有無一個適合嘅季節。

下午3點各區雨量及陣風 (香港天文台網站截圖)

唔係有假放就適合行山


小學都有教過,郊遊旅行最好嘅季節係秋高氣爽。原因係嗰陣氣溫無咁高,天氣亦較為穩定。至於春天又點呢? 只要打開農曆嘅日曆,就可以睇到端倪。以下呢幾個節氣,完全可反映春天嘅情況:

  • 雨水 (正月): 春天第一場雨
  • 驚蟄 (正月至二月): 春雷驚動了昆蟲動物
  • 清明 (二月): 古詩有云:「清明時節雨紛紛」,當然成日落雨啦。
  • 穀雨 (二月): 天氣溫和,雨水明顯增多。今年嘅穀雨,正正係4月20日星期六,紅雨當日。

中國以農立國,節氣可以反映各個季節嘅天氣情況,給予耕作上嘅指示。所以,就算睇下農曆嘅節氣,亦可以知道春天係有雨、有雷,天氣唔係太好嘅季節。呢種天氣,當然唔係適合行山啦。

所以,唔係話有長假期就去計劃行長途山徑。春天時份天氣常有突變,行咁長途遇上風雲變色,要徹離確實唔容易。

呢個季節,都係行短途好嘞。

識得睇雷達雲圖對預測天氣好有幫助。可參考地下天文台台長《氣象‧人‧語

Fitz連結: https://fitz.hk/?p=117966


更多:
Fitz Facebook專頁
[科學研究] 行山見到建築物 心情會大打折扣
[八十後的光怪陸離] 長洲氣象站 近距離欣賞「風球」
Fitz Hiking 行山


文章為作者意見,不代表Fitz立場。

歡迎投稿: https://fitz.hk/contribute/

廣告
山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。