[網上凶狠] 跑山可唔可以擔遮?

上星期日 (7月22日)，港島徑舉行「迷你四徑」山賽。比賽完咗之後，有人喺 Facebook 專頁發佈包膠。不過，呢位師兄提到一件事:

「最有趣的是竟然擔遮，小弟孤陋寡聞，跑山賽擔遮實在第一次見，如果有師兄師姊沖落山時衝埋去就大鑊了! 未知她們完賽之後收獲了多少串眼球呢?!」

呢個帖子，引發不少討論。先講講「迷你四徑」港島徑站詳情:

• 比賽日期: 7月22日
• 路線: 港島徑五、六段 (大潭道 > 黃泥涌峽)
• 距離: 8.5公里
• 限時: 5小時

跑山定係行山?

討論最大爭論嘅地方，就係「跑山比賽可唔可以擔遮」? 筆者就試下用理性去拆解下：

1. 比賽距離8.5公里，限時5小時。即係平均一小時行1.7公里，仍然唔會被DQ。咁嘅速度，又真係幾難話係跑步喎。當然，玩得比賽故然想挑戰自己，不過亦有啲朋友係想體驗一下比賽氣氛，慢慢行都得啩
2. 大會規則除咗禁止參加者搵人陪行之外，並無其他禁止事項，亦無限制參加者裝備。所以，就算有人幾唔鍾意其他參加者擔遮 (又或者著泳衣)，大家都只可以網上呻下

擔遮有降溫作用

反對擔遮一派，認為玩得山賽，無理由怕曬而拎住把遮，因為咁會製造危險。不過覺得擔遮無問題嘅朋友，就有唔同睇法:

1. 擔遮並唔只係防曬，仲有降溫作用。有測試證明，戶外擔遮可以降低頭頂溫度最少攝氏2度。喺酷熱天氣之下，呢個舉動絕對有可能救你一命
2. 事情係咪危險就睇用裝備嘅人，唔應該怪個裝備。即係話，如果擔遮嘅人用得小心，根本唔會有咩危險。唔通因為有人唔識用行山杖亂咁篤親人，就反對行山跑山用行山杖?

一句到尾，互相尊重啦，比賽上大家雖然係競爭者，但唔係敵人囉。

迷你四徑官方網站

Fitz 連結: https://fitz.hk/?p=99778

更多:
Fitz Facebook專頁
香港長跑行山比賽
Fitz Running 跑步