奧巴馬一家輕裝HEA行。請留意，佢哋個個都贊同山雞推薦，著住跑鞋行山。
美國總統奧巴馬，北朝領袖金正恩，竟然差唔多時間都有行山嘅新聞。
美國雜誌《People》就影到相（上圖），話奧巴馬一家喺上周末（4月18日）離開白宮，喺附近行咗兩個幾鐘，
至於「肥仔恩」金正恩就認真得多，佢同軍隊登上海拔2750米高嘅白頭山，受到幾百名軍人擁戴。
----- 廣告 Ad -----
我對政治無乜興趣，只係關心佢哋嘅裝備。奧巴馬一家雖然只係喺附近行兩個鐘（記者只係話佢哋去「Nature Walk」），但亦有運動常識。一家大細著住輕便運動裝備，加埋對舒服跑鞋，就算係Hea行，都叫做做足準備。
至於北韓嘅肥仔恩，佢身上著絨布大褸，腳上穿皮鞋，登上呢個成三千公尺嘅高山。絨褸絕非行山適當裝備，以佢呢個落雪嘅環境，絨褸整濕咗之後會越嚟越重，加重負擔又影響靈活性。至於皮鞋，你懂的，除咗強國強人著皮鞋高踭鞋上黃山華山，一般人未經特殊訓練，都唔好立亂試。
有傳媒就因為呢對皮鞋，而懷疑金仔嘅登山之旅係造假嘞。哼，你哋咁諗實在太膚淺，邊個話金仔係自己行上山？佢坐直升機到山頂得唔得？佢坐八人大轎上山又得唔得？
資料：People.com, cri.cn
山雞
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。