週末新界西北區山徑,一家四口攀上某「天梯」,仲有幾百級樓梯先到山頂。因為太陽猛烈,四人行到身水身汗,爸爸從佢嘅 The North Face 背囊拎咗包紙巾出嚟,一人派一張抹汗。十一、二歲嘅妹妹邊行邊邊抹,行下行下一個唔覺意,紙巾就跌咗喺地下,而妹妹就繼續向山頂進發。

呢張紙巾就係咁,被遺留於山徑之中。

一條毛巾有幾重?

疫情關係,令過往唔多行山嘅市民,都上山呼吸新鮮空氣。不過唔少人顧住買行山鞋、行山背囊、行山杖,但又忽視呢種「貼身裝備」: 抹汗毛巾。

行山係運動,做運動會出汗,所以抹扞毛巾絕對係行山嘅重要裝備。毛巾唔會太重,亦唔會太阻定,更唔係貴價用品,所以唔帶毛巾去行山嘅原因,除咗因為疏忽之外,就相信係因為紙巾實在太方便。

不過,紙巾處理不當會變成垃圾,而製造紙巾要斬伐樹木,堅唔環保,大家實在要改變呢個習慣。

更何況,講抹汗效果,一條毛巾絕對比一包紙巾優勝得多。

一張紙巾降解要三年

聽過有人話:「紙巾既然係由樹木製成,係天然成份,丟佢喺山上面有得佢自分解咪得囉。」

呢個講法有相當嚴重嘅誤解:

  • 紙巾無錯取自天然材料,但係製造時加入唔少化學成份,由得紙巾遺棄於山頭,絕對係會造成污染
  • 理論上,任何事物都可以自然降解 (degradation,塑膠都得,不過要幾百年啫)。紙巾分解最快幾星期,要完全降解就需要大約三年時間,仲要視乎天氣等因素。如果人人都拎張紙巾上山丟,相信紙巾佈滿山頭佢都降解唔切
  • 問題唔係紙巾可唔可以降解,而係大自然係屬於大家,點解要製造垃圾污染佢呢?

「山野無痕」,就係希望大家進入山野之時,唔好遺下任何痕跡,以免造成不能逆轉嘅傷害。


文章為作者意見,不代表Fitz立場。
歡迎投稿: http://fitz.hk/contribute/