行山裝備與物資朋友知我鍾意行山,間中收到留言問:「我今個禮拜想行下山,有咩行山路線推介?」試過,有次開工開到炆炆地,見到呢啲留言,反問咗句:「你知唔知行山要帶啲乜?」結果畀人block咗。

我其實想講,行山去邊度,行咩路其實唔重要,最重要係你帶啲乜。山野無7仔無舖頭,甚至連電話都收唔到,有咩事真係要靠你背脊孭住嘅嘢咋。當然,行慣山嘅朋友帶啲乜唔使我多講,但對新手嚟講,都要有人提下佢哋。

1. 背囊
輕便、貼身為要。令身體平均負擔物資重量,無咁易攰。

2. 衣著
切記要輕巧舒適,千祈唔好著牛仔褲。可選一般運動衫褲,運動鞋(最好係跑鞋或行山鞋)。另外,山野風大,背囊放件薄身風褸。

3. 水
大約每10公里帶一公升水,包括任何飲料。

4. 食物
視乎路途長短。就算無預計會中途休息食嘢,都帶備少許乾糧,以防有意外要留在山野。至於行長途,就依個人口味帶啲輕便糧食。另外,可帶啲零食(我鍾意薯片)。

5. 電話 + 尿袋
鄧梓峰有教,帶電話好有用。雨天的話,用個密實袋入住佢呀!
仲有,電話可儲存定你之前搜索好嘅行山路線、地圖,以及一個電筒嘅App,用嚟求救同照明用。

6. 銀包
帶幾多錢唔重要(當然無理由拎幾皮嘢上山啩),最緊要出門前放低晒啲碎銀、會員卡、八折卡,以免提高負重。銀包入面,只放八達通,提款卡信用卡我就唔會帶。喺山唔見銀包真係唔使旨意搵得返。

7. 毛巾/手巾/太陽帽/太陽眼鏡
呢類型裝備,坊間而家有好多選擇,例如毛巾都有「棉質」或者「濕水變冷毛巾」俾你揀等等,總之以「用得舒服」同「輕便」為大前提,因為上到山,明明1分嘅唔舒服都會變成10分,點解唔好著牛仔行山都係咁解。

提一提大家,以上呢啲都係行短程山嘅基本嘢,而且,覺得自己應付唔嚟嘅話,都最好搵個有經驗朋友帶住行山啦。行山必要裝備與物資_01更多:
行山初學者的3大秘訣
[行夜山之選] 頭燈定係電筒好?
[有片] 保護郊野的4小步
Fitz Hiking 行山


文章為作者意見,不代表Fitz立場。

歡迎投稿: http://fitz.hk/contribute/

山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。