近年 Google Map 亦發展迅速,香港幾條主要山徑已經有埋實景,「用眼睛去行山」都得,所以唔少人行山時遇到唔熟路,都會跟住 Google Map 去行。

不過,Google Map 拎嚟行街或者無問題,但倚賴佢做行山導航,好大機會會出事。

離線地圖不支持步行

Google Map 可以下載某個範圍嘅離線地圖 (offline map),喺無網絡無WIFI時瀏覽,但係佢有個重大缺陷,就係離線瀏覽啊陣,只係睇到駕車嘅路線,步行模式係唔適用。所以,就算之前規劃好路線,做好功課, Google Map 都唔適合行山之用。(某些國家嘅 Google 地圖係有提供離線行山路徑)

上線用都唔好

利用 Goolge Map 行山,最好有流動網絡先好,但要 keep 住連線,其實亦有一定問題:

  1. 郊野唔少地區流動網絡都有盲點,網絡訊號差,檢視網上地圖或有難度
  2. 經常要「load住」電子地圖,消耗手機電量
  3. 部份香港境內地區,會「強行」將訊號轉至大陸網絡,萬一無關閉漫遊功能,隨時收到天價帳單

離線地圖App幫到手

雖然實體地圖加指南針,仍然係最正規嘅行山裝備,不過今時今日又真係好難叫大家帶呢兩樣嘢上山,畢竟睇地圖、搵位置,一部手機已可以待勞。咁電子地圖唔一定係 Google,仲有大把選擇:

1. TrailWatch  iOS | Android

可在出行前預先下載離線地圖,全程唔使用網絡,齋用 GPS 都得。App內路線由用家提供,夠晒貼地。

2. 香港遠足路線   iOS | Android

有等高線,完全適合行山用,路線齊備,新手至老手都啱。

3. OruxMaps (只限Android

適合熟悉網上地圖使用者,地圖詳盡,規劃行程方便,功能強大。

帶多部手機睇地圖

如果一心一意放棄實體地圖,而使用電子離線地圖,綜合前輩心得,有幾件事要注意:

  • 記得出行前先預備好電子地圖及路線,免得去到起點網絡不穩延誤行程
  • 只要下載咗離線地圖,就可以唔使用流動網絡,靠手機GPS定位就OK
  • 拎多部舊手機行山,用作睇地圖搵位置之用。只要手機有GPS功能,運作正常就可以,就算行山時開住手機睇路線,都唔怕無電無得打電話求救
  • 唔好一過次 download 太廣範圍地圖或太多路線,除咗塞滿你嘅手機容量,檔案大亦會影響瀏覽速度


文章為作者意見,不代表Fitz立場。

歡迎投稿: http://fitz.hk/contribute/

朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。