行山遇牛阻路點算 1
夠晒位過丫,個Pat大把位!

今日突然收到小師妹訊息,問我:「我而家行緊山,有隻牛阻住我哋,點算好?」 (上圖)

我諗都無諗,覆佢:「無視佢,照行!佢個Pat仲有位呀!」

師妹問:「佢會唔會起飛腳踢低我哋,又唔會衝向我哋架?佢有對角架!」

我隨即問下班山友,佢哋就提議以下呢啲做法:

  1. 舉高雙手,大聲叫「走開呀!」
  2. 揮動樹枝,作勢拍打佢哋,牛隻會掉頭走。 (據講呢個係農民趕牛動作)
  3. 走埋去佢耳邊,好聲好氣同佢哋講:「唔好意思,借借丫!」有人話香港啲流浪牛會聽得明廣東話,佢哋會識相行開喎。
牛隻三五成群,又真係會塞住條路。
牛隻三五成群,又真係會塞住條路。

上面呢啲做法好似好神怪,不過提出嘅人都話好work。而我山雞就採取「掩耳盜鈴」嘅方法,即係盡量唔打擾佢哋,喺佢哋身邊行過就算。至於啲牛會唔會襲擊人類?我喺香港行山就真係未見過。

有露營友話,營地嘅牛會主動衝入營幕搵嘢食,甚至趕極都唔走。咁喺營地附近,就真係要小心啲呀!

不過講番轉頭,郊野地方無論人類同動物都有份,你話牛阻住你行,咁隻牛又會話你阻住佢食草啫。

更多:
Fitz.hk Facebook專頁
[既方便又快捷] 11條藏於民居的行山徑
[北潭涌有巨蟒] 4招應付被蛇咬
Fitz Hiking 行山

分享
山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。