能高越嶺古道有台灣屋脊之稱。

行山要做足準備,指嘅係唔單止裝備、籌劃、補給,連身體狀況都要有所準備。台灣近日就有單因為身體有問題上山,而差啲無命嘅個案。

一位中年山友,平時都有做運動,好鍾意行山,試過專誠去歐洲行白朗峰。佢早前去花蓮嘅「能高越嶺古道」作多日登山之旅。「能高越嶺古道」處於海拔2000米左右,唔算係咩艱難山徑,大概兩日就可以搞掂。而且呢位山友打算慢慢玩,所以 plan 咗行足9日。

不過當佢行到第6日,開始覺得體力嚴重透支,後來更係舉步維艱。結果,團友急call救援送佢落山,再直接去醫院檢查。

橫紋肌溶解症

經醫生檢查後,發現佢體內肌肉酵素高達到3萬幾 (正常數值係200左右),即係話已患上嚴重「橫紋肌溶解症」。呢種病,壞死嘅肌肉會釋放大量肌球蛋白,可引致腎衰竭。好彩呢個仁兄搶救及時,避免洗腎,住院11日後出院。

主診醫生話,呢位登山客雖然間中有行山,不過平常都唔多做運動,所以突然要連續咁多日行山,體力透支過度。而最重要嘅,就係佢要負重19公斤,令佢嘅肌肉過度運動,最終引發橫紋肌溶解症。

橫紋肌溶解症患者小便呈深色


醫生話,如果發覺運動期間肌肉無力、疼痛,小便濃色,可能係橫紋肌溶解嘅症狀。患者必須吸收大量水份,並且即時停止運動。如果計劃進行多日登山活動,就要做足訓練。

資料: 台灣聯合報

其他文章:

文章為作者意見,不代表Fitz立場。

歡迎投稿: https://fitz.hk/contribute/

廣告
永誠
講求綠色、環保、天然的健康生活。推廣新一代健康生活文化。