依家新型肺炎仍然肆虐,大家人心惶惶,希望可以早日唔使帶口罩,無後顧之憂地呼吸一啖新鮮空氣。呢啲時候,好多人選擇去行山,不過我哋每禮拜見到大帽山多人過旺角,又或者山徑上面見到大量棄置嘅口罩,都幾令人擔心。個個想行山佢哋肺炎,但如果太多人嘅話,反效果不特止,仲可能會攬炒 (好似最近喺清水灣咁)。

所以,識揀嘅一定揀啲冇乜人去,而且風景優美嘅路線 (最好有返少少難度)。而我哋 TGR 比賽嘅賽道,全部係精挑細選,既有風景,又有挑戰性。最重要嘅,係有好多唔係成日有機會去嘅山徑。

不如我哋一齊睇吓,我哋 TGR Summits 17公里嘅賽道有咩特別? 首先,你會喺石壁開始。遠就遠啲,但勝在人煙稀少。


見到個咁靚嘅水壩,真係成個人醒晒! 係咪好想馬上開始呢? 沿着鳳凰徑上去羗山同靈會山,周圍嘅風景,唔係一般山徑能夠媲美嘅。然後上到山頂,你會發現你已經完全離開人群,真真正正係行山唔係行街。爬升有一定難度,所以咁先至練到嘢嘛!

之後上到鳳凰徑五段,非常平坦同風景優美,適合快步行或者跑步。如果你想慢慢散步,又或者腳痕想跑返幾公里嘅話,呢段路可以滿足到你。

最後你會一覽西大嶼山一望無際、冇乜俾條橋擋住嘅海景,然後慢慢落山,進入大澳小鎮。如果想行特別啲嘅路,可以離開原定路線,行上呢一條非常長嘅橋上面,直入大澳市中心。雖然大澳有啲遠,但係總算人少,同埋可以好簡單咁搭巴士返去東涌。

想行長啲嘅話,可考慮我哋27公里組別嘅賽道。難少少,不過係風景一樣咁好。喺梅窩開始,跟住沿鳳凰徑上大東山同鳳凰山,經彌勒山同深屈道上鳳凰徑五段去大澳。

想去17公里起點,喺東涌有11A或23號巴士俾你選擇,27公里嘅話,有來往中環六號碼頭同梅窩碼頭嘅小輪,或者喺東涌搭3M巴士。

離開嘅話,有1號巴士去梅窩,或者11號去東涌。

下載17km GPX
下載27km GPX

想行山不過唔想迫人? 我哋幫到你。我哋好快會介紹其他賽道,記得留意喇!

The Green Race HK Facebook專頁
The Green Race HK 網站


文章為作者意見,不代表Fitz立場。

歡迎投稿: https://fitz.hk/contribute/

廣告