行山行到身水身汗,見到有條溪澗,大家未必夠膽即刻將水飲落肚,但總會有人走去濕下毛巾,洗下面、洗下手。不過有「化學教父」之稱嘅鄺士山 K Kwong,最近撰文討論呢啲「山坑水」,話「山坑水」唔單止唔可以飲,連掂都唔可以掂!

流動溪水可天然過濾?

好多人都有個想法: 溪澗有砂石,有過濾功能。流動嘅溪水流經呢啲砂石,會將細菌、污穢物清除。

不過,K Kwong 強調溪水其實好污糟,就算喺視線範圍睇到唔有人污染河溪,但難保於上游地方有人整污糟河水,而呢啲細菌除咗以高溫消毒或淨水丸潔淨,係唔可以單靠砂石過濾。

與此同時,K Kwong 亦提醒大家,郊野有好多野生動物都倚賴溪水生存,佢哋身上嘅細菌亦可污染河水。

山徑不時有人收集溪水

唔飲得,洗手洗面得唔得?

K Kwong 就話,溪水連洗手洗面都唔好! 佢話廿幾年前行行山覺得隻手好痕,點知發現傷口有條白色嘅蟲鑽出嚟,佢懷疑條蟲係當佢喺河邊洗手時鑽入皮膚。所以佢建議大家,喺香港行山,見到有溪澗都唔好走落去洗手洗面。


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 郊野溪水洗手洗面得唔得?「化學教父」一槌定音