資料圖片
台灣一名63歲男子，決意回歸大自然，走入深山居住。不過喺山中生活三個月後，周身唔舒服，體重減輕，食慾不振。後來，男子肚腩更越來越大，但體重輕咗成30磅，結果有日昏迷被送入院。經醫生檢查後，證實佢患上阿米巴肝膿瘍感染，肝臟有個20厘米嘅腫瘤。好彩及時就診，將腫瘤切除，救返一命。
主診醫生話，呢位病人長居深山，唔注意食物衛生，飲用嘅山水未經煮沸，因此被阿米巴變形蟲入侵。而變形蟲會隨住血液循環到各個器官，呢次變形蟲就攻擊肝臟，而引起可致命嘅效果。
阿米巴肝膿瘍感染
眼部最易受感染
醫生提醒大家，溪水就算望落好清澈乾淨，但內裏都會存在各種細菌或寄生蟲，會引致嚴重疾病。而阿米巴變形蟲常見於溪水之中，所以就算點口渴，都一定要飲用經處理嘅水。
----- 廣告 Ad -----
戶外用嘅濾水器
事實上，阿米巴變形蟲最常攻擊嘅器官係眼部。喺山澗活動、水上活動，如果處理不當，被溪水濺中眼睛，就有可能感染疾病。2019年，有女士露營時被溪水濺中眼睛，又無及時沖洗眼睛，最後阿米巴變形蟲攻擊眼角膜，引致角膜染菌潰爛。
本港衛生防護中心亦提醒市民，阿米變形蟲會引致「棘變形蟲角膜炎」，可導致患者永久視力受損或失明，須施行角膜移植才可回復視力。所以，進行戶外活動，如必須飲用天然水源，記緊先行過濾。眼睛被河水濺中嘅話，記得用清水清潔眼睛。
(濾水器使用可參考《[老hike都去camp] 露營裝備測試 濾水器》)
資料: 今日健康
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。