[香港奇景] 黃竹角咀 鬼手岩 1
據講鬼手啲手指越來越少,又越來越短。大家真係唔好跳上去影相呀!(圖片來源)
鬼手岩係香港地質公園嘅地標,好多人都係相入面睇過呢舊「奇石」。不過,由於路途遙遠,位置偏僻,所以唔少山友只係隔住個mon睇下相。

一般而言,去黃竹角咀可以由烏蛟騰起步,行12公里左右,再走回頭路。想挑戰自己體能,就可以由大尾篤出發,沿船灣淡水湖,沿海邊到黃竹角咀,俗稱「環湖出咀」,最後出烏蛟騰走人,全長超過30公里。

黃竹角咀嘅海岸,奇特嘅紅色泥土。
黃竹角咀嘅海岸,奇特嘅紅色泥土。

最短嘅線,就係由西貢黃石碼頭,租「大飛」或「細飛」(即快艇,大嘅可載約20人,細嘅載6至7人),坐船30分鐘直達黃竹角咀,然後依以下路線到烏蛟騰搭小巴走人。

    • 路線:黃石碼頭 (船) > 黃竹角咀 > 大嶺 > 跌死狗 > 鹿湖峒 > 上下苗田 > 烏蛟騰
    • 距離:12公里 (黃竹角咀至烏蛟騰)
    • 需時:10小時
    • 難度:4.5星 (5星最難)

Google Map缺乏山徑資料,只供參考。行山時必要依據適合之郊遊地圖。

沿途可以睇到呢一類路牌。
沿途可以睇到呢一類路牌。

注意:

  1. 有關租船:
    1. 快艇以每隻計算,2015年開船費約 $600一隻。人多啲,每人計自然平啲。
    2. 天氣唔好,快艇隨時唔可以喺黃竹角咀登岸。通常,冬季海浪較大。
  2. 黃竹角咀至烏蛟騰之路線極長,需時甚久。無論由陸路以至海路,都必需要一早出發。否則就要作行夜山嘅打算。
  3.  此路中途完全無補給,必要準備充足糧水,仲要預備會無啖好食。(除非你勁到孭晒煮食用具食材誓要食餐好!
  4. 路線要上山落山,必需要體力好。
  5. 山徑無遮蔭,做好防曬。
  6. 該處電話網絡不穩,可定時向親友匯報行踪。
  7. 地質公園景觀為大自然傑作,要小心保護!

更多:
Fitz.hk Facebook專頁
[西貢三尖] 睇魚岩頂 望海一流
[香港三尖] 蚺蛇尖 高難度打大佬
[香港三尖] 登青山 夠爽快
[香港三尖] 釣魚翁
Fitz Hiking 行山