睇到網上行山群組有人轉載一輯圖片，內容係圖主去某個海邊摸蜆，仲摸到一大堆，一家人食都可應該夠。問題係香港近岸嘅水質咁污糟，圖主敢唔敢食呢? 留言有人引述圖主話:「我只係摸嚟玩下咋……」
如果屬實，筆者真係無話可說。蜆都係生物，唔食佢又要捉，因為好玩? 定係為咗影相認叻? 定係有人係混世魔王，以殺生為樂?
人類總是犯上同樣嘅錯誤，幾年前筆者都寫過類似文章，嗰次係有旅行團以「生態觀測」為名，帶隊去海邊摸蜆。筆者就提出過摸蜆呢件事，對生態環境係百害而無一利:
- 一隻蜆每日可以過濾200公升海水。摸晒海邊嘅蜆，絕對會令水質變差。水質差嘅話，又會令其他海洋生物減少。
- 蜆係唔少較大型生物，如魚、鳥類、蟹等，主要食物來源。無晒蜆，其他生物亦會唔夠嘢食而減少。
- 太多人踐踏泥灘，會踩死埋海星、蟹等生物
- 摸蜆製造海洋垃圾，污染海洋
![[唔好做殺手] 摸蜆破壞海洋 1](https://i2.wp.com/fitz.hk/wp-content/uploads/2016/05/%E5%94%94%E5%A5%BD%E5%81%9A%E6%AE%BA%E6%89%8B-%E6%91%B8%E8%9C%86%E7%A0%B4%E5%A3%9E%E6%B5%B7%E6%B4%8B-1.jpg?resize=600%2C341)
所以台灣，以及唔少西方國家，都會保護海岸生物，只有有牌嘅漁民先可作有限度捕捉。
香港以其海港名聞於世，大家可唔可以出力保護佢?
講求綠色、環保、天然的健康生活。推廣新一代健康生活文化。
