[保護郊野] 山野不留痕7大原則

疫症下，周末郊野逼滿行山人潮，山徑受到破壞垃圾處處，令愛山朋友心痛不已。事實上，早於上世紀八十年代，西方大自然愛好者覺得，人類可以與大自然共存，他們提出 Leave no trace「山野不留痕」保育概念，希望優美環境得以保存。

中國香港攀山及攀登總會山藝科 就近日本地山徑人多、垃圾多嘅問題作出回應，再次提醒大家「山野不留痕」7大原則:

1. 籌備旅程

出行前，無論係自己行定跟團，都應該先規劃好路線，對路線作多方面了解。

2. 走現有山徑

雖然古語有云:「路是人行出來」，不過「開山劈路」始終係破壞山野所為。而且喺唔知路況之下抄小路，容易迷途或受傷。

3. 帶走自己的垃圾

做好自己本份，帶幾多嘢上山就要帶幾多嘢落山。而疫情期間，更加唔好喺山上亂揼口罩，令郊外成為播毒溫床。

4. 保持郊野原貌

不要斬樹，不要摘花草，不要攀上奇石。石景要千萬年才形成，破壞咗對公眾係一大損失!

5. 減低火的傷害

郊外唔好食煙，露營人士唔好隨處生火，容易引發山火之外，草地熏黑了也難以回復原貌，因而令水土流失，營地受破壞。

6. 善待野外動物

郊外係野生動物嘅屋企，遊客只係過客。你去人屋企就唔好阻住人! 到郊外時，盡量與動物保持距離，只可遠觀。更加唔好餵飼野生動物，令動物失去搵食本能，或令佢哋不自然地增加繁殖率。

7. 為其他遊人設想

郊外應該一個寧靜嘅地方，畀人聽下大自然嘅聲音，所以郊遊遠足時盡量將聲量降低，音樂只播給自己聽，說話只講畀朋友聽，沿途休息亦以不阻人為原則。

資料: 中國香港攀山及攀登總會山藝科

Fitz呼籲

面對疫症，我哋唔希望自己染病，亦唔希望身邊人染病，更加唔希望全香港染病。呢個禮拜，確診數字每日以雙位數增加，係時候一齊打好呢場仗!

過千位醫護人員呼籲「我堅守崗位、你堅守在家」，希望香港市民盡量減少不必要外出，當然包括行山、跑步、郊遊等活動。懇請大家4月10日前，唔好約人、唔好組團，減少交叉感染機會，避免疫症擴散。

不停loop住嘅 #關鍵14日，而家真係到咗關鍵時刻，今次要靠大家一齊自律!