夏天行山要注意: 規劃路線留意山徑「遮蔽度」

夏天行山，太陽絕對係頭號敵人，所以喺規劃路線時，要留意山徑嘅「遮蔽度」。

近年，漁護署官方山徑都有列出「遮蔽度」，將山徑分為高、中、低三級，顯示山徑樹蔭情況，越高級即係越多樹蔭。

夏天行山點解要有樹蔭?

1. 頭頂係身體最吸熱嘅地方，頭頂被太陽直射，會令體溫大為上升
2. 有時樹蔭雖然未能夠隔絕所有陽光，但樹木能吸收太陽熱量，令周圍溫度降低
3. 樹林有時會伴隨溪流，河水可為身體降溫

做足準備免中暑

若果天氣濕度太高，樹蔭濕氣難以散開，人行走其中，反而會感到酷熱，所以完全倚賴「遮蔽度」於炎夏行山，並非最佳策略。要免避中暑就應有所對策:

1. 帶備充足食水

大概每10公里帶1公升飲用水，而背囊要維持約500毫升後備水。

> 見《水多人不怪? 行山帶水有學問》

2. 定時飲水

唔好等口渴先飲水，亦唔好只在休息時飲。要定時飲水，避免身體缺水

3. 提升裝備

太陽帽、透汗衣褲、毛巾等缺一不可。炎夏行山比冬天行山裝備更要齊備

4. 規劃路線

規劃路線不要過份進取，要量力而為，亦可行走多樹蔭、有溪澗的山徑

5. 結伴同行

酷熱之下行山屬高危活動，搵多個同伴，有咩事都可以支援

最後提醒一句，山徑幾時都喺到，天氣情況太惡劣，絕對唔應該勉強而行!