Fitz > 運動 Sports > 行山 Hiking > 山友食飯的九型人格

如果一齊行山,唔會一齊食飯,咁頂多係隊友唔係朋友,因為行山講品格,食飯講性格。只要一食飯,就發覺每一個山友都好有趣,因為行完山嗰種肚餓,行完山想食返餐好嗰種渴望,行完但行得太夜要返屋企隊毒毒杯麵嗰種返工無糧出嘅感覺,係不足為外人道。

唯有喺無法抑制人類最原始渴望嘅同時,就會睇到對方嘅真性情。

1. 意見領袖型

Grace 因為之前返電台早班 (5、6點嗰隻),所以次次行到入夜都雞咁腳閃返新界,喺好多次無得食,再有得食係明顯極饑渴,意志極堅定。絕招:趁大家意志力薄弱之際,不斷「only you」式攻擊,大家就會就範。

「食雞煲啦!」(真係食雞煲?)「食雞煲啦!」「荃灣大把雞煲!」(結果去咗一品,唔叫太多牛,百五蚊落樓)

一品雞煲

2. 100%零意見型

個個都俾意見,唔通個個都想俾意見咩?無錯,Raymond 係唔想俾意見。由頭到尾保持緘默,但有食嘢。欣賞佢,因為各自點餐嗰陣佢就有返意見。

3. 俾你估到仲係食神型

有次行完話打邊爐,Jacky 斬釘截鐵話,咁我唔去啦,原因係好好笑:「班朋友次次約出嚟都係打邊爐,都唔明有咩咁好打,次次都打,你地又打咁我唔去!」(心諗可能肥牛係佢好朋友)

但下一次話食雞煲,佢又話ok,問佢唔係唔火鍋咩,佢又話雞煲唔同。(唔同嘅點係⋯?)

食神你好嘢。

獅子山精神隊 (左至右):黃宗顯精神科專科醫生 Willy、Law少 許耀斌、Jacky仔、Raymond

4. 啤友:Law & Kwan & Wind

唔使講嘢,未學行先學走,未叫餸就嗌啤酒,幾多個杯? (Law & Kwan & Wind)

同埋最近間間都有Asahi

5. 返咗自己屋企型

真係好正,每次 Kelvin 會突然拎部手機出嚟睇動畫,然後不問世事。每次食到中途,佢會突然食完,完全與世隔絕。每次再講都話好飽。絕技係會將牛柏葉放入未加水嘅雞煲底入面。

同三條友拎手機出嚟睇波係相映成趣。

6. 真係食家型

對食絕對有要求,Matthew 去得就知間鋪頭招牌係咩,例如去陳根記就要食手撕雞,同埋無人會食粥,食粥唔係呢度。陳根記飲埋啤都係每人七十幾,抵。去雞煲會點粉絲,大家會驚為天人,然後佢會沾沾。

7. 入咗 program 型

其實唔止潘潘,不過佢就比較有代表性。因為腦部唔運作,去同一個地方,就會叫同一味餸,例如去坪石食彬記,就會叫西檸雞,所以有「西檸雞」之稱。鳴謝彬記,因為彩虹夜媽媽開嘅舖就係佢,薑蔥魚腩、海鮮什菜與沙嗲牛都係必叫。

彬記越食越多嘅海鮮雜菜

8. 精神上同在型

我的好隊友 Willy,行完就早抖,唔係忙到嘔,就有下場走,期待有一日知道佢真口味。

9. 遙距參與型

  • 香港區代表:GAS
    • 單憑肉眼睇湯汁相就知道我地去咗一品。
  • 英國代表:小琳
    • 總之檯面上有佬味甚濃的食味,你就會想影俾佢睇。

練完毅行返歸食飯推介

  1. 西貢區:坪石彬記,小巴直落,食完又落彩虹站,開得夜,性價比ok,有唔舒服可以食粥
  2. 沙田區:陳根記,大排檔,抵,可以現場換衫,唔會臭親人,享受八十年代空地街坊聚集的人情味,姐姐夠多嗲
  3. 荃灣區:一品雞煲,夠多位,雞夠嫩洋蔥一流,雞煲而言性價比極高

有一班行山友叫「獅子山」

獅子山精神隊樂施毅行者籌款網頁

更多:
Fitz Facebook專頁
[獅子山精神隊] 挑戰黑暗恐懼
[獅子山精神隊] 對不起,隊友們,我要變魔鬼了
[獅子山精神隊] 行毅行,起步之初
[獅子山精神隊] 37度下 新丁打大佬
[獅子山精神隊] 毅行開操 在西貢37度的一天出發之十八死士
[樂施毅行者2017] Fitz x 獅子山精神隊
Fitz Hiking 行山


文章為作者意見,不代表Fitz立場。