Fitz > 運動 Sports > 行山 Hiking > 悼.大帽山郊野公園木牌

3月15日 (星期二) 晚上10點左右,一部白色 Tesla 跑車,沿荃錦公路往荃灣方向,駛至大帽山郊野公園入口,車輛失控撞爛路中心嘅「大帽山郊野公園」木牌,亦撞爛旁邊一列路牌。司機被困車內,最後被救出送院救治,警方將案件列作「交通意外有人受傷及有政府財物損毀」處理。

「最有標誌性嘅路牌」

呢個「大帽山郊野公園」木牌,或者係唔少人口人嘅「波牌」,座落於荃錦公路同大帽山道交界,亦即係大帽山郊野公園嘅入口,過咗呢個位,就屬於大欖郊野公園,所以相當具標誌性。

而且,亦因為其位置獨特,木牌令唔少人留下好多回憶:

  1. 坐51號去大帽山,由油柑頭、曹公潭、川龍一路上斜上到頭暈,一見到木牌就鬆一口氣,因為知道可以落車
  2. 參加毅行者去到呢到,即係已經完成80%路程,剩番嗰20公里,無論點辛苦,都可以捱到落去
  3. 大霧嘅時候,咁大個木牌畀到大家一個容易睇到嘅目標

有人話佢係「最有標誌性嘅牌」,或者有人會唔同意,不過無咗個牌,就肯定係一大損失。

「無價之寶」

呢單新聞於3月15日晚瘋傳後,有心水清網民問:「個司機要賠幾錢?」《頭條日報》就發表過一篇由汽車專家 Leo Sir 發表嘅文章,列舉撞毁公物需賠償嘅金額:

  • 欄杆每米約 $400
  • 路牌每個約 $500
  • 安全島燈箱每個約 $1,000
  • 消防水龍頭每個約 $8,000 至 $9,000
  • 紅綠燈每組約 $15,000
  • 大型電燈柱約 $18,000 至 $30,000
  • 公路風琴式防撞欄每個約 $90,000

上述賠償未計施工費用同埋封路等開支。

圖: 網上圖片

至於「大帽山郊野公園」呢個木牌,唔計製造費工程費,淨係「大帽山郊野公園」呢幾個字同佢嘅意義,已經可以話係無價,真係唔知點計好。不過,既然呢塊路牌對市民咁重要,署方唔該快啲整返好佢先。


文章為作者意見,不代表Fitz立場。