當地同類型旱廁
美國華盛頓州一名女行山客，日前去到 Mt. Walker 忽然人有三急，去公園內嘅旱廁方便。點知一個唔留神，手機跌落廁坑。為咗要拯救手機，佢唔理廁所有幾臭，一手拉開廁坑木板，打算用狗帶吊返手機上嚟。
可惜，拯救行動未如理想，無計可施之下，行山客用狗繩縛住自己，然後下降落糞坑執手機。點知佢又無技術又無裝備，結果成個跌咗落去。雖然執到部手機，自己就身陷「險境」，嘗試10至15分鐘逃出失敗後，結果佢用執返嚟嘅手機，報警求助。
救人嘅消防員
消防員快速趕到現場，迅速將行山客救起，有份救援嘅消防員話，職業生涯從未遇過呢類行動，而被救嘅行山客，拒絕送院檢查，甚至拒絕消防員借水喉畀佢沖身。呢位行山客話，佢只係希望第一時間離開呢個令佢難堪嘅現場。
據消防員指，旱廁糞坑一般唔會太深，跌咗落去未必會浸死，不過仍然危險，大家唔好立亂落坑。
資料: Kitsa Sun
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。