Fitz > 運動 Sports > 行山 Hiking > 打破謬誤! 要認真思考的行山常識

行山謬誤正所謂各有各法,行山技巧其實一樣,都無得話誰是誰非。不過有啲講法,我就覺得有商榷餘地咯。

行到慶烚烚跳落水固然happy,不過要乾衫乾毛巾換先好做。
行到慶烚烚跳落水固然happy,不過要有乾衫乾毛巾換先好做。

「咁熱,梗係濕咗條毛巾先啦!」
天時暑熱,行到成身黐立立,有人見到水喉或者溪澗,就會即刻衝埋去,濕咗條毛巾,抹乾淨個身先。不過,大家要記住,濕毛巾係唔會咁快乾,咁你繼續行,又再繼續流汗,仲可以用咩嚟抹身先?

其實,行山期間應該盡量保持毛巾乾爽,唔係啲快乾毛巾都唔會賣到成二百蚊一條。濕身固然可以令身體降溫,但呢個只係一時之快。事實上,身體保持乾爽先有助排汗,而排汗就可調節體溫。所以,如果唔係帶多過一條毛巾,就唔好立亂整濕佢。而毛巾唔用住,就應該掛喺背囊吹乾。

行山謬誤_003 「唔識行山就帶支行山杖穩陣呀!」
行山杖係輔助工具,亦可以係負擔。而且,用行山杖都要學,用得唔好,反而會影響步伐,甚至整傷上半身。我山雞整眼見過,行麥徑第三段碎石路,有人鼓勵新手拎支杖出嚟,結果險象橫生。

總之,使用行山杖其實係一大學問,遇到難行路段,手足並用最好。自問係新手未識得點用,就唔好帶上山咯,背囊留番啲位放多支水仲好!

有時難得路段,想有機會飲水食嘢都唔易。
有時難行路段,想搵機會飲水食嘢都唔易。

「行緊山就唔好食零食啦!」
行山會消耗體力,食嘢一啲問題都無,仲好應該。而且行一大段路,飲水飲保礦力都會搞到口淡淡,食零食簡直可以提升士氣!至於咩零食就人人喜好唔同,毅行先生陳國強KK,就話鍾意X星趣趣銀魚。至於我,就鍾意拎住包薯片,一路行一路食。一包薯片所帶畀你嘅士氣,可以頂足十公里。

行山謬誤_002
呢位阿哥,似擺PO多過飲水囉。

「等大休我哋先飲水食嘢!」
行山期間要不斷補充水份,唔好等到大休先拎支水出嚟。覺得口渴肚餓,先至食嘢飲水,身體已經用緊你嘅儲備水份同能量,到時先飲食就已經係太遲。所以行住飲行住食,其實就係行山嘅常態,並唔需要出奇。

不過落斜盡量唔好飲水食嘢,因為落斜令身體跳動,嗰時進食會影響腸胃。要食要飲留喺平路或上斜先啦。

更多:
10大令人討厭的行山行為
山雞其他文章
Fitz行山文章


文章為作者意見,不代表Fitz立場。