[郁民教室] 新手行山應該去邊?

由

2015-12-17

Fitz > 運動 Sports > 行山 Hiking > [郁民教室] 新手行山應該去邊?

一上 Facebook 行山 group，間中會睇到呢啲留言：「請問有無咩行山路線適合新手呢?」有時真係好佩服谷友好有耐性認真去解答，因為呢個問題一啲都唔易。其一，所謂新手，究竟有幾新? 年紀又幾大? 鍾意爬山、睇海定係睇星? 畀著我，真係唔知從何入手。

籠統咁講，新手行山揀路線可以考慮以下幾個原則:

近屋企

香港差唔多區區都有幾座山，而呢啲山頭，大多數都有晨運設備甚至晨運徑。而喺屋企附近行嘅優點，就係較為熟地頭，迷路嘅機會唔大 (因為你至少會認到地區地標)，而且又唔使逼車逼船。至於裝備方面，亦可以盡量輕巧，等真係發覺自己愛上行山，先慢慢添置啦。

最初叫你漫無目的行一轉城門林道，相信唔少人會覺得悶。如果唔係，近年啲人都唔會一窩瘋逼去大棠睇紅葉，或者上大東山睇芒草。所以，初初行山除咗要考慮難度，亦可以揀啲有靚景睇、有好嘢食，甚至有動物睇嘅地方。有個自己鍾意嘅目標，會令你忘卻行山嘅辛苦。

交通固然係計劃路線嘅一個考慮因素，不過對新手嚟講，最重要應該係離開嘅交通。如果第一次行山就遇著要喺西灣亭過百蚊一位嘅黑的，隨時會影響心情。亦最好揀啲方便撤離嘅路線，萬一發覺行唔掂，都可以安全走人。

唔係睇雙子座流星雨，係講緊每條路線嘅難度級別，越多星星就難行。咪睇輕呢啲星星，全都有根有據，自問自己係新手，就唔該揀一兩星。

提下大家，漁護署有個叫「郊野樂行」嘅網站，有齊全港咁多條山徑，全部都係廣闊大路，大家可以上去慢慢揀。