日本富士山未來擬開徵登山稅

日本《產經新聞》報道，山梨縣及靜岡縣政府於3月中確定政策方針，將現時向登山客象徵式收取嘅「富士山保全協力金」(入山費) 改為「登山稅」，並且制訂更嚴格登山條件，目的係加強山區管理，保護山野環境。

由2014年開始，登山客進入富士山五目合，都可按意願繳付每人1,000日元嘅入山費 (約港幣$70)，不過呢個並非強制性。據統計，靜岡縣方面2019年收到約5750萬日元嘅入山費，只有約67%登山客有畀錢。

至2020年受疫情威脅，富士山首次「封山」，成為兩縣地方政府契機，去改變「入山費」或「登山稅」政策，暫時兩地政府都傾向開徵「登山稅」，目的為求:

1. 統一繳費安排，以免造成不公
2. 保護富士山環境
3. 完善登山客安全措施
4. 宣傳富士山作為世界遺產嘅「普世價值」

當局亦希望喺徵費同時，順道加強登山客嘅「登山禮儀」，例如禁止遊客著拖鞋上山，以及全力禁止未預訂山屋嘅旅客進山。佢哋希望於五目合嘅登山口開始徵稅，不過具體稅金仍未有定案，而且開展初期亦非強制性。

據報導，收稅理念得到大多數官員及議員支持，不過有地方人士亦對「登山稅」有所保留，佢哋認為要落實措施有一定困難。

當地媒體估計，呢項「登山稅」都唔會喺呢一兩年內落實。

資料: 《產經新聞》