大家睇條標題，唔好以為我埋咗周溶堆，我唔會勸大家支持政府嘅政改方案。我只係覺得，對住而家啲政府部門，捉咗你返差館，你有晒不在場證據，都可以夾硬拘留一位智障人士，而事後仲要死唔認錯，要認錯又要等到凌晨大家瞓晒覺，仲只係得句「抱歉」。令我諗起，以前住屋邨，有時D惡人被逼向人低頭，講嗰句「對唔X住囉~~~」(或而家啲人講so99y)，唔服氣之餘，又帶啲蔑視，聽完真係會扯火！
噢，對唔住，離咗題。（呢個真心架，唔係抱歉，係道歉嚟架。）
政府部門嚟講，漁護署喺推廣佢哋屬下嘅公園設施，其實都算唔錯。至少佢哋嘅行山徑、郊野公園等，市民都好容易上佢哋網站搵到詳細資料。而隨住科技發展，佢哋製作嘅行山Apps亦算滿足使用者需要。
今年三月，漁護署管理嘅海岸公園，已經係Youtube設立咗個頻道，入面有齊海下、印洲塘、東坪洲、鶴咀以，同埋沙洲及龍鼓洲各個海岸公園嘅介紹，製作亦算認真。佢仲以頻道形式發表，咁希望佢哋會陸續有嚟，唔好爛尾啦。
海岸公園Youtube頻道： https://goo.gl/8gXI9F
同場加映：
香港獨立攝影師蘇嘉進（Francis So）一段5分鐘嘅短片《我所看見的美麗香港》，喺葡萄牙嘅國際攝影展獲得四獎。呢條片拍攝咗香港四季風景，睇完真心覺得香港嘅風景確係美不勝收。
更多：
[興烚烚] 炎夏行山救命法寶
山雞其他文章
Fitz Hiking 行山
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。
