Fitz > 運動 Sports > 行山 Hiking > [武漢肺炎] 為抗疫 美國洛杉磯關閉山徑 香港可以封山嗎?

美國疫情爆發,多個州隨即實施「留家令」,全國有四份一人口要留喺屋企。加州早前亦推行有關措施,除咗購買食糧、藥物,以及做運動之外,國民要留於家中,唔準出街播毒。

因為「留家令」准許國民出街做運動,令到大批市民湧至山徑、沙灘等地方「做運動」,聚集大批人群,成為高危地方。

因應呢個問題,洛杉磯縣政府就實施更嚴厲政策:

「封閉國家公園以及附近山徑」

有關方面強調,呢項措施係希望大家謹守疫情下社交原則,與其他人保持6呎距離,以防止疫症在社區大爆發。

LA居民都鍾意上山打卡

香港應暫停行山活動

疫症爆發以來,每逢周末本地山徑都人滿為患,山徑人潮比市區商場更擠逼更墟冚,行山已成為播毒嘅高危活動。有見及此,唔少熱心山友都呼籲: 「呢兩個周末暫停行山,俾山野休息一下。」

因為佢哋相信:

  1. 回應醫護呼籲:「留守家中,支持醫護」,減少外出,減輕醫護人員壓力
  2. 現時周末行山人士太多,甚易傳播病毒,暫停行山,有望令人潮減少
  3. 山野幾個月來過份消耗,需要喘息一下
魔鬼山 人潮

行山要顧已及人

就算唔可以喺呢個時期暫停行山,各位行山人士都希望可以:

  • 行山團最好暫停公開活動,就算出團都控制一下人數,在四至五人之內,以免成為傳播疫症嘅群組
  • 放棄去熱門山徑 (如龍脊、八仙嶺、玉桂山),可選擇自己社區嘅晨運徑
  • 唔去離島或郊外村落,以免干擾原有居民嘅防疫壓力
  • 放棄活動前後聚餐,山上野餐亦最好分開食,野餐地點亦唔好揀多人地方
  • 行山時保持人與人距離,盡量維持在1至2米
  • 山徑遇到人潮時,戴返個口罩
  • 勤洗手,特別係活動前後,記得清潔雙手
  • 自己垃圾自己揼,仲要拎出市區先揼

唔少專家都好擔心,香港會大規模爆發疫情,真係要靠大家通力合作,避免疫症再度爆發!

資料: NBC

鳴謝 閒山樂 提供疫情下的行山建議


文章為作者意見,不代表Fitz立場。