Fitz > 運動 Sports > 行山 Hiking > [毅行備戰2016] 如何挑選你的隊友?
四個人要一齊行100公里,唔係剩係跑得快就得。
四個人要一齊行100公里,唔係剩係跑得快就得。

按:「毅行備戰」呢個系列,主要目標係初初參與毅行嘅新手。對於行山當食生菜嘅前輩、老手,我山雞亦無謂喺大家面前獻醜。我亦歡迎大家對我多啲鞭撻!

樂施毅行者2016,已經落實540隊嘅名單。唔知係咪山雞黑氣纏身,仲黑埋我嘅朋友,我認識嘅朋友之中 (包括埋Facebook、WhatsApp,甚至微博嘅群組)真係未聽到有人中籤!唉!

中籤嘅朋友固然開心,而根據咁多年嘅情況,呢個時候亦係「重組隊伍」嘅開始。因為喺10月26前,仲可以免費更改隊員資料。

咁應該點揀你嘅隊友?一個最簡單辦法,就係叫佢行一次山!具體點做?不如我就講番件十幾年前嘅往事先。

話說十幾年前,我諗住連同幾位肥仔,諗住組織一支「肥仔Team」。呢班肥仔入面,大多數人都無乜行山經驗。於是,我膽粗粗搵咗「毅行教室/主」KK陳國強兄,請求佢帶我哋行一次山。

KK二話不說,一口應承,仲約我哋喺北潭凹第三段起點等。

我問KK:「我哋好多人未行過麥徑,一開波就行第三段怕唔怕?」

KK答:「怕咪好囉!而家怕,好過之後怕呀!」

剩係由北潭凹直上牛耳石呢一段,真係嚇親唔少新手。
剩係由北潭凹直上牛耳石呢一段,真係嚇親唔少新手。

而根據呢次行山,畀我了解點為之好隊友:

  1. 行山能力反而其次 (因為可透過練習提升),最緊要係夠膽嘗試。見到碎石路唔會要求人哋拉你落山。
  2. 真心鍾意行山。行到雞公山腳,都可以笑住爬上去。(又或者,雖然爆晒粗行上山,不過到山頂都會笑下)
  3. 有互相支援嘅心。見到隊友唔掂,會適當時候引出援手。
  4. 不怕艱苦。唔怪得KK會揀第三段作第一次操練。

結果行咗幾耐我就唔記得。剩係記得一行四、五個人當中,有兩位肥仔第二日已經同我講,唔會再行麥理浩徑,咁當然退出毅行者啦。

補充一點,所謂好嘅隊友其實行得山反而係其次,最重要係投緣。古語有云:「毅行者嘅隊友,一係會做一世老友,一係會做一世仇人。」真係友情大考驗!

更多:
Fitz.hk Facebook專頁
[毅行備戰2016] 抽籤派彩係戰鬥開始!
跟住矛盾去「毅行」
[紅過發哥] 山界明星狗波比仔
Fitz Hiking 行山


文章為作者意見,不代表Fitz立場。