呢10句說話，參與過毅行嘅朋友一定講過！雖則話自己講過未必會認，但包保聽過/講過嘅人一定會心微笑！（亦適用於苗圃、圖騰跑等長途行山活動……）
- 麥理浩一定係個衰人，設計條咁嘅路嚟害人！（牛唔飲水呀老友！）
- 參加完呢次，一定唔會再行（聽住先……）
- 啲路牌邊個設計架？明明話X公里，點解行極都唔到？（明明佢只係行咗10米）
- 條路邊個設計架？做乜咁多樓梯/斜路/石屎路/髮夾灣/平路……？（操唔足唔好賴條路啦！）
- 好肚餓，想食餐蛋面／飲可樂／凍檸啡／雞蛋仔…… （口尖程度同大肚婆有得揮，不過都係得個講字，最後咪係有咩送到埋口就食！）
- 過埋呢座山就落斜架！（其實自己都行到懵下懵下，旨在安慰自己安慰人咁啦）
- 我哋係咪過咗個Checkpoint？點解行極都唔到？（深宵時份，最常見於第九段）
- 寶礦力／Power Gel／佳得樂……難飲過XXX呀！（當你逼住連飲一種嘢兩日，就算係楊枝甘露都係咁話）
- 哎吔……哎吔……哎吔哎吔哎吔………（腳痛、背痛、腰痛……）
- 咦，我隻腳呢？
怨天由人、賴地硬，其實係毅行，或其他行山活動，其中一大樂趣。而呢啲說話，就成為朋友間傳頌千古嘅逸事，亦係毅行嘅樂趣之一！
毅行．傳承
Fitz.hk為樂施毅行者2016大會媒體伙伴
更多：
Fitz.hk Facebook 專頁
[毅行備戰] 系列
Fitz Hiking 行山
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。
