Fitz > 運動 Sports > 行山 Hiking > 漁護署「禁止餵飼野生動物」宣傳 何解狂吸留言又吸嬲?

10月底 漁農自然護署Facebook專頁 發表宣傳圖，呼籲市民唔好喺郊外餵飼野生動物。對好多人來講，行山露營時唔接觸野生動物係常識，不過呢張相引來好大爭議，留言超過500個，當中有百幾人仲係畀嬲嬲。

部份留言其實非常值得深思，我哋係咪應該檢討一下，對待動物嘅態度呢?

白鴿可以自己搵食?

呢位英文留言大意係: 張圖錯到飛起，白鴿並唔係野生動物，城市嘅白鴿係需要餵養。至於香港嘅牛牛，一定唔係野牛，佢哋係需要人類餵飼。基於錯誤資訊去妖魔化餵飼及有同情心嘅人，係非常愚蠢同錯誤。

郊野無草牛牛食乜?

五百幾個留言有一大部份，都係同牛牛有關。

佢哋講緊嘅，相信係西貢創興嘅牛牛。2011年，漁護署將部份新界流浪牛，遷移至萬宜水庫創興水上活動中心出面草地。不過，呢塊草地不足以餵飼呢處幾十至一百隻牛，後來呢處甚至被劃為營地，草地變為沙地。

近年愛護動物人士發現問題，就組織牛牛義工隊伍，自資自發到創興及其他地方，運草運人到郊外餵飼牛牛。

上面唔少留言，就係指責漁護署強行遣送牛牛到「荒漠」，但又禁止市民餵食飢腸轆轆嘅牛牛。

不過，唔少專家都相信，無論白鴿、馬騮定係野豬，如果過度接受人類餵食，就會失去覓食能力。而且人工食物通常營養過份良好，會大大提升呢啲動物嘅繁殖率，令動物數量大增。

關於牛牛，關於野生動物，野外生態，大家可以去一啲保育動物嘅組織了解多啲。

文章為作者意見，不代表Fitz立場。