[炎夏行山] 休息要識搵位

行山唔係比賽（嗱，毅行者雖然計時，但唔屬於競技比賽呀，籌款就應該鬥多。），見攰見口渴見有風景睇，停低休息絕對不為過。特別係炎炎夏日，人嘅身體並唔係機器，行到咁上下絕對有需要唞一唞。不過山頭雖大，但亦唔係話唞就唞，要應該要揀下位。我就根據以下幾項原則：

1. 唔阻人：無論幾攰幾想休息，都唔好喺狹窄嘅山路停低。當然，行一次山總會遇到有人鍾意坐喺樓級吹水食嘢攤唞。你要喺佢身邊左穿右插，你自己都覺得討厭。己所不欲物施於人呀！
2. 有遮陰：親眼見過有Pair男女喺三十幾度嘅太陽底下坐喺度，男士話個佢女友覺得頭暈。夏天行山，有太陽曬住同有遮陰，溫度隨時相差五度。既然覺得熱要唞下，無理由想越坐越熱啩？就算有唔舒服要即刻唞，都盡量去到有樹蔭嘅地方先。
3. 有風吹：有自然風當然可以令身體降溫。畀啲耐性搵下位，山野地形複雜，行多幾步隨時已經係唔同世界，搵到個風口。
4. 避蚊蟲：山谷位雖然有樹蔭，但若未防蚊準備，我就唔會停留，無謂餵蚊。

補充一下，行山時嘅休息時間每次最多五分鐘，因為唞得太耐要整番著要浪費更多體力。除非預咗hea行，計劃咗去野餐，睇靚景（譬如行開馬鞍山，一定會預半粒鐘喺昂坪睇風景。），我盡量唔會坐，因為一企番喺身，雙腳有一段時間先可以重新適應。而休息時，盡可能放低背囊（嫌污糟咪掛喺樹上），幫背脊降溫。此外，休息期間亦可調較鞋帶，整理背囊、水壼等。

更多:
[山野餐廳實搵笨?] 13蚊一粒墨魚丸
[上山容易] 婆仔上樓級大法
山雞其他文章
Fitz Hiking 行山