[由奧巴馬在野講起] 漫畫教人求生技能

早排奧巴馬去咗拍英國求生專家Bear Grylls嘅節目”Running Wild with Bear Grylls“，成為新聞焦點。睇片段，奧巴馬跟住Bear，喺阿拉斯加搵嘢食，結果畀佢哋執到條畀熊咬咗一半嘅三文魚，不過，主持人呢次似乎過份善待呢位美國總統囉！

嗱，咁多年我都係Bear嘅擁躉，佢以前Bear喺節目嘅食物，唔係蟲蟲三文治、生食羊眼，就係大笨象屎水（佢話係非洲草原嘅食水來源！），呢次佢竟然生火煮食，去款待奧巴馬，就真係令我有啲失望。

Bear Grylls嘅成名之作，就係喺Discovery Channel播出嘅《Man Vs Wild》(明珠台都有播過，譯做《人在野》)。節目好睇嘅地方，就係Bear身處荒山野嶺，而佢要借助好少嘅求生工具（通常得刀仔同火石），度過幾日旅程。

其實講開野外求生節目，我細細個曾經沉迷一套叫《危險調查員》嘅漫畫。作者就係以《20世紀少年》成名嘅浦澤直樹。《危險調查員》就係講一個前英國特種部隊SAS嘅軍官（呢個背景有啲似Bear），擔任保險調查員期間，點樣喺荒野化險為夷。

我細個雖然唔會有機會上雪山、去沙漠，但睇完套漫畫後，有幾個野生求生技能，真係畢身難忘：

1. 喺沙漠可在膠袋上小便，然後可製造食水；
2. 喺沙漠著西裝原來好過著獵裝；
3. 上雪山遇風暴，可以挖個雪窿匿埋；
4. 蕩失路唔好四圍走，坐定定等人救最好。

呢套漫畫真係教識我唔少嘢，各位喜愛山野嘅朋友，有機會搵嚟睇下啦。

更多：
Fitz.hk Facebook專頁
[山郊散記] 馬騮走八仙
急救包應放甚麼? (下)
Fitz Hiking行山