視疫症為無物 網上群組公然組團行山

第四波疫情持續，每日確診數字於高位徘徊，佐敦油麻地宣佈為「疫區」，政府封食肆、封運動場、封健身室，各行各業大受影響。無論政府以至民間，每時每刻都叫大家避免聚眾、謹守崗位，非必要都唔好出街。不過，仲有好多人充耳不聞。

行山群組多「勇士」

部份鍾意行山嘅朋友，似乎唔受疫症影響，仲夠膽組織行山團。隨便上去網上行山露營群，已經發現一批又一批「勇士」。

大年初十BB蕉

呢單係搵人去金山郊遊，然後落九華徑BBQ，位位$178。呢個仲要包裝成親子活動，真係以為小朋友唔會染病?

城門水塘群組

重點並唔係行城門水塘都要跟團，而係二人一組，但係就一團收10個人。既然知道有二人限聚令，知道有防疫措施，點解仲要視法紀如無物?

限聚令下的親子露營

呢名自稱為「野外訓練導師」，搞咗個「私人活動」(唔係商業活動)，2日1夜去橋咀洲露營，仲話要教授小朋友「安全意識」。先唔講呢名「導師」嘅錯字、漏字、簡體字睇死人，明知有限聚令 (佢叫做「限制令」)，只係話要「自己去承擔責任」。再加上呢個「野外訓練導師」嘅資歷真係唔知從何而來，成個活動真係伏伏地。

點解要攬炒

政府防疫措施進退失據，唔少行業都遭受「割喉式」摧毁，筆者身邊好多山藝導師、運動教練都處於手停口停狀態。不過，呢個唔係疫情嚴重時期，舉行公開活動嘅藉口。

至於一般山友，想行山鍛鍊身體，搵家人陪行就好。萬一搞個「行山群組」、「露營群組」，再嚟多幾波疫情，咁就真係攬炒。