相信行山友喺一兩年都會發現，郊野嘅野生動物越來越多。由野豬、松鼠、蛇，甚至以往難得一見嘅赤麂，唔使大家出力搵，間中都可以喺山徑旁邊遇到。究竟係香港郊野公園嘅環境越來越好，有助野生動物繁衍，定係郊野外圍 (即係政府口中嘅「低生態價值地區」) 陸續發展，令野生動物嘅活動範圍縮少，逼住佢哋會走出山徑呢? 筆者唔係專家，真係識條鐵，不過早前 Now TV 播出一套新聞紀錄片，希望大家去睇睇，反思一下我哋人類同動物嘅之間嘅關係，有時過度愛護愛護佢哋，反而會適得其反。
郊野唔淨止野生動物多咗，似乎連流浪狗都唔少。筆者喺城門主壩嘅衛徑，目睹二三十隻野狗對侍。佢哋雖然無意圖去攻擊人類，不過我見到呢個情景，真係怯怯地。最近 Facebook 流傳一篇文，題相係《野狗帶來的禍害》，文章由 香港野 Hong Kong WildCreatures Facebook 專頁發出。
文章大概咁講:
- 大多數狗都係源自人類棄養，變成流浪狗。流浪狗為咗搵食而上山，成為野狗
- 野狗在郊野無甚天敵，在郊野之中會引發牠們的野性
- 野狗會捕捉野生動物，殘害野外原有動物
注: 原帖以英文所寫，中文版本為專頁管理員代為翻譯，當中或多或少有出入，各位在評論前敬請先看英文版
解決方法
帖子引來網民激烈辯論，有人支持文章作者，有人覺得追捕郊外野狗太不人道。不過，相信大家都唔可以否定一點，就係呢啲喺郊野生活嘅狗隻，並唔係野外嘅原生物種。
咁點解會有咁多狗隻走入深山生活? 其中一大原因，相信係有人將棄置嘅寵物狗送到野外。
香港野 Hong Kong WildCreatures 提出三個解決方法 (以下為原帖文字):
- 我們必須教育大家，不要棄養狗隻，要法例明文禁止。同時，承認野狗會對本地的野生生物有重大威脅 (其實貓也同樣……咁樣可能更火上加油!) 問題全是人類遺棄狗隻。這些主人是誰? 為甚麼要……這樣做? 我們可以對正下藥嗎?
- 我們要執法阻止棄養，追縱主人是誰，高調檢控和重罰。所有狗隻都有晶片的話，要追縱不太困難。
- 我們如何解決現時的野狗? 我個人認為不能留牠們在野外威脅野生動物、我們的狗隻和我們。捕捉牠們? 為牠們絕育? 我們為甚麼要餵他們?
呢三個方法究竟可唔可行，大家仲可以慢慢討論。與此同時，大家喺郊遊時，千祈唔好干擾野生動物嘅生活，唔好餵佢哋，唔好搞佢哋，畀人類同動物都有個和諧嘅環境!
香港野 Hong Kong WildCreatures Facebook 專頁
Fitz連結: https://fitz.hk/?p=109511
Fitz Facebook專頁
[野生動物] 箭豬會射箭傷人?
我家的動物朋友野豬先生
[囉嗦大叔] 我們的野生動物朋友
Fitz Hiking 行山
生於亂世，有種責任。這個責任就是做好自己，感染別人。鍛練好身體，才能裝備自己，迎接亂世。
