郊野公園係咪禁煙區?

相信大多數人都唔想去到郊野，因為有人吸煙而聞到冤崩爛臭。既然行山係戶外運動，食煙 (無論一手二手定三手) 會破壞健康，所以唔少人都有錯覺，以為香港郊野公園係禁煙區。

其實，無論係《郊野公園條例》及《林區及郊區條例》，都無將香港郊野列為禁煙區，但大致可以依照以下規章去限制吸煙行為:

• 依照法例，「任何人不得在郊野公園燒烤場地以外範圍生火或用火，以及可能引致失火的方式拋棄任何火柴、燃點香煙、煙斗灰燼；否則，一經定罪，最高罰款二萬五千元及監禁一年。」換句話講，只要唔喺燒烤場或營地，點著支煙嗰一刻，就已經違法。
• 「食電子煙咪唔使點煙囉。」電子煙有無火，要由法官裁決 (未有案例)。不過，2019年香港已經禁止售賣電子煙，咁你支電子煙點嚟，麻煩同執法人員解釋下先。
• 《郊野公園遠足安全指引》，建議郊遊人士應避免吸煙。理論上，漁護署職員見有人食煙，會加以勸止。

台灣經驗

世界衛生組織於2000年後，全球著力禁煙並設立委員會，香港政府亦有加入，期後決定在室內及公眾地方禁煙。不過，郊野公園嘅條例似乎落後於大形勢。反觀台灣，「山林禁煙」已全面推行多年:

• 2014年，太平山森林遊樂區禁煙，違者罰款2,000至10,000台幣 (約港幣500至2500)
• 2018年，台北市135條步道禁煙，違者最高罰款10,000台幣 (約港幣2500)
• 2020年，新北市66條步道禁煙，違者罰款2,000至10,000台幣 (約港幣500至2500)

此外，就算無推行全面禁煙嘅行山徑，大多數台灣山林都會劃出「禁煙區」，於樹木密佈、山火高危地區禁止遊人食煙。

1996年八仙嶺山火，有傳係因食煙引起，唔少人對呢件事仍然記憶猶新，所以希望有關當局可以收緊法例，令市民可以享受空氣清新嘅郊野。

資料: The hiking Database 山野‧新聞庫