有山友報料，龍脊最近多咗個大型裝置。

化名「主席」嘅山友話，呢個裝置位於龍脊向石澳方向，過咗打爛埕頂山嘅長命斜，向前行少少就會睇到。裝置仍然未整好，以帆布圍住，從遠處望大概兩米高，以木製造，外型「三指向天」，有人話係「龍爪手」。

網民一面倒認為，裝置與大自然環境格格不入，因為龍脊貴為國際知名嘅香港山徑，以無敵海景聞名於世，而家整個人工裝置，其實會阻礙景觀。有網民甚至認為，裝置應與香港風水局有關，信不信由你。

3月8日更新: 有關當局已移除有關裝置。

龍脊奇怪裝置相集

民間命名大賽

有人就從外型為裝置命名:

1. 豉汁鳳爪

金龍係五爪，三隻爪應該係鳳爪! (筆者按: 鳳爪係有4隻手指)

靈犀一指

手指向上，應該係一種世界共同語言。喺國際知名嘅龍脊放呢個裝置，可以宣揚世界大同。

金手指

加藤鷹絕技，不解釋。

If we burn, you burn with us.

小說 / 電影 《飢餓遊戲》(Hunger Games) 中嘅反政府軍嘅手勢 (三指向上)，最近被緬甸反軍政府示威者採用，以宣揚自由、反極權。

百發百中揸波龍爪手

「龍爪手就梗係韋爵爺嘅獨門絕招啦!」

早前政府話要豪花5,500萬改善郊野設施，唔少山友都好驚政府會「無嗰樣搞嗰樣」，唔通畀大家不幸言中?