杯靈雙渡一景山界流傳「行山考牌路線」,唔係要考到牌先畀你上山,所謂「考牌路線」,只係山友挑戰自己嘅活動。

行山考牌以挑戰為目標

據說於上世紀70年代,當時香港郊野公園初發展,唔少郊野地方仍未開發,山徑狀況、補給等情況不甚理想,於是成為山界高手挑戰目標。

其中最大改變係八仙嶺。以前嘅「行山考牌路線」有所謂「八仙連走」,但隨衛奕信徑開放,八仙嶺各個山頭都舖設石屎路,「八仙連走」已唔算係好大挑戰了。

近年香港興起嘅行山熱潮,亦令「行山考牌路線」有所改變。好似話以前嘅「環湖」(環繞船灣淡水湖),再加入「出咀」(黃竹角咀鬼手岩)。狗牙嶺以前亦不屬「考牌」,近年「狗牙全走」已晉身考牌路線。

縱觀幾條考牌路,都離不開以下幾方面:

  • 山徑狀況不良: 路線要行走碎石、懸崖等艱難地形
  • 距離長
  • 補給少,往往要負重徒步
  • 交通不便,難以中途退出

**  以下呢4條行山考牌路線,係山界高手流傳嘅大挑戰,一般行山人士不宜嘗試。就算高手老手,亦要有良好規劃,搵好同伴,帶齊糧水裝備,揀個天氣好嘅日子,先好出發。**

4大行山考牌路線

1. 一尖三咀過四灣

圖: 孫立民
  • 簡介: 西貢大浪灣高難度路線。「一尖」係蚺蛇尖;「三咀」係米粉咀、短咀、長咀;「四灣」係東灣、大灣、鹹田灣、大浪西灣。
  • 行程: 北潭凹 > 蚺蛇尖 > 米粉咀、短咀、長咀 > 東灣、大灣、鹹田灣、大浪西灣 > 西灣亭
  • 有咩難: 路況崎嶇,上下坡幅大,距離長,中途難以離開。
  • 距離26公里,需時約12小時 (視乎當日天氣及參與人士體力狀態)

一尖三咀過四灣 路線圖 (只供參考)

2. 環湖出咀

環湖徑上的觀音峒山脊,相當險要
  • 簡介: 以船灣淡水湖郊遊為骨幹,再加黃竹角咀至鬼手岩一段路 (亦稱環湖出咀摸鬼手)
  • 路線: 烏蛟騰> 馬頭峰> 赤馬頭> 雞仔峒> 大峒> 觀音峒> 石芽頭> 鹿湖峒> 跌死狗> 鳳凰笏頂> 白角山> 昂莊山> 大嶺> 黃竹角咀鬼手岩> 大嶺> 昂莊山> 白角山> 鳳凰笏頂> 鵝髻頂> 三門山> 長牌墩> 三門墩> 主壩> 大尾篤
  • 有咩難: 以距離長,無補給聞名。加以山徑崎嶇,前往黃竹角咀一段山徑不甚明顯,容易迷路,夏天、新手絕對不宜。
  • 距離31公里,需時約14小時 (視乎當日天氣及參與人士體力狀態)
圖: 囉嗦大叔

環湖出咀 路線圖 (只供參考)

3. 三牙全走

圖: Kaihin
  • 簡介: 較新晉考牌路線
  • 路線: 石壁水塘 > 西狗牙 > 一線生機 > 東狗牙落 > 中狗牙上 > 一線生機 > 閰王壁 > 斬柴坳 > 昂坪
  • 有咩難: 於險要嘅懸崖之間穿梭,考體力考膽色
  • 注意: 近年熱門山徑,周末往往要排隊上山
  • 距離13公里,需時約10小時 (視乎當日天氣及參與人士體力狀態)
圖: WL

三牙全走 路線圖 (只供參考)

4. 杯靈雙渡

靈雙渡「一線脊」
  • 簡介: 於月球表面嘅碎石山徑行足10公里,仲要上上落落
  • 路線: 青山杯渡寺 > 青山山頂 > 良田㘭 > 乾山 > 一線脊 > 圓頭山 > 靈渡寺 > 廈村
  • 有咩難: 考體力、考膽心、考耐性,仲途無樹蔭、無補給
  • 注意: 圓頭山於2021年1月山火,路徑更難行
  • 距離10公里,需時約8小時  (視乎當日天氣及參與人士體力狀態)
圖: 阿寶@重行人生

杯靈雙渡 路線圖 (只供參考)

記住「行山要考牌」只係大家嘅玩笑,呢四條路線係高手對自己能力嘅挑戰已而,切勿當真以為要考牌。行山最開心都係喺自己能力以內,享受郊野之美。


Fitz 提提你
任何行山遠足活動,必須在出發前作出詳細規劃以及準備,擕帶充足及合適裝備,以及告知親友目的地及回程時間。制訂路線,更要量力而為,注意補水,切忌逞強冒進。可參考[顧己及人] 山野遠足安全常識


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 4大行山考牌路線