日本私人森林變身營地，港幣$6,600年費任玩

日本近年興起露營熱，連帶有關露營嘅裝備及設施都大為改進。最近就有私人森林開放為露營場，仲成立會員制度，每年畀幾千蚊就可以「任露唔嬲」。

《日本經濟新聞》日前報道，該國大約六成森林屬於個人所有，不過因為打理森林要花鉅額費用，超過30% 森林主都愛理不理，促成大批森林搵唔到繼承人，甚至唔清楚森林界線。於是，有人為避森林被荒廢，就將森林開放成露營場。一方面鼓勵更多人接觸郊野，另一方面可以維護森林環境。

呢啲森林露營場，唔會有水有電，更加唔會興建公廁、士多，絕綷開放一個原始嘅野外環境，畀露營愛好者投入原野之間。佢哋採用會員制度，一個年費就係可自由進出森林，營友帶備基本裝備，就可以喺森林隨意露營。

當中較大規模嘅「MOKKI NO MORI」，有山有河有樹，佔地45公頃，大約相等於三個維園，已經招收1,500名會員。個人會員每年111,000日元 (約港幣6,694)，家庭會員132,000日元 (約港幣8,000)。

MOKKI NO MORI

香港官方營地開放遙遙無期，平均幾百蚊港幣玩足一個月，真係羨慕死香港營友。