2020年7月14日政府新聞公告話:

「現時漁護署轄下的郊野公園內的163個燒烤地點及41個露營地點,亦由明日 (7月15日) 起關閉…… 在以上設施關閉期間,任何人均不得在郊野公園進行燒烤及露營活動。署方會加派人員巡邏相關地點,如發現有人違規,會採取適當跟進行動。」

由2020年7月15日至2021年5月26日,全港42個合法營地 (仲有個屬於康文署嘅貝澳營地),已經封閉咗10個月又11日,一共315日。為咗疫情,封閉營地當然無可厚非。不過呢段期間,好多防疫措施已經放寬:

  1. 2020年7月15日,康文署轄下之戶外康樂場地及設施包括網球場、草地滾球場、運動場、牛池灣公園射箭場、石澳障礙高爾夫球場、屯門康樂體育中心、草地球場、人造草地足球場、硬地球場、門球場、乒乓球枱、燒烤場、極限運動場、滾軸溜冰場、滾軸曲棍球場、滑板場、戶外健身設施、模型車場、模型船池、單車設施 (單車通道除外)、露天劇場、公眾游泳池、泳灘、水上活動中心、度假營和貝澳營地等,將暫停開放。不過今日 (2021年5月26日) 上述設施已經開放 (有16個泳灘重開並提供救生員服務)
赤柱正灘泳灘 圖: 政府新聞處圖片

2. 兒童遊樂場封閉之後,於2021年4月開放
3. 食肆由不設晚市,以及最多二人一枱。至今可營業至凌晨二時,最多八人一枱,宴會最多100人
4. 圖書館封咗幾個月,亦已經重開
5. 市民可以隨意到訪郊外行山,運動期間可以唔使帶口罩
6. 市民可以出街跑步,唔帶口罩都得
7. 本地足球聯賽於2021年2月20日復賽,並已完成兩項杯賽

圖: HKFA 香港足球總會

8. 香港業餘田徑總會於4月舉行「5公里錦標賽」,並於5月舉行「田徑系列賽」

五公里錦標賽 圖: HKAAA
9. 2021年4月,巴塞爾藝術展如期舉行

10. 2021年5月,樂團Mirror舉行6場演唱會,總計到場觀眾超過10,000人 (包括場外無飛入場嘅歌迷)

圖: HK mirror fans

點解露營唔得?

戴個頭盔先,我唔係話上面呢啲活動如常舉行係唔啱,政府設施重開我亦好支持。

作為鍾愛香港嘅營友,我哋亦明白要齊心抗疫,不過諗極都唔明,點解上面呢啲戶外或室內設施可以重開,但營地又要繼續封閉? 如果話露營活動會令人群聚集,令病毒擴散,咁市民行山、跑步就得,露營又點解唔得? 市民參觀藝術展又得,去聽演唱會又得,露營又點解唔得?

為咗防疫,相信大多數營友都唔介意政府喺營地實施防疫措施,例如限制2人一營,每個營要相隔N米。政府似乎連諗都唔諗,就一刀切剝奪市民有益身心嘅活動,絕對於理不合。


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 露營 Camping > 營地封閉315日,我哋仲要等幾耐?