頭燈都算係露營標配裝備之一。頭燈最好嘅地方係可以騰出雙手,方便行夜山、入夜後起營、打繩結之類。所以自頭燈普及化之後,都好少人用手電筒了。頭燈平至 $1x – 貴至 $1xxx 都有,究竟應該要點揀呢?

1. 電池

大部份頭燈用嘅電有分: 乾電池、鋰電池及兩者兼用:

  • 乾電池: 穩定性高,唔會越用越暗,同時有得換電,唔擔心行行下斷電嘅問題。
  • 鋰電池: 相反會越用越暗,但usb叉足電後都比較耐用,又可以叉住用,如果會去雪山,鋰電池表現更出色。

市面更有可以兼用的款式,彈性更高。

2. 防水度

考慮到天氣突變問題,所以防水度都係考慮範圍之一。防水度會用 IPX 嚟表示,後面數字越高,防水度越好。依家一般所謂嘅「生活防水」係 IPX4,只能防潑水。如果想防雨水就需要 IPX6 或以上了。

圖片來源

3. 制的靈敏度及大細

因為頭燈9成時間都係放頭上先開關,所以好唔好撳、個制大唔大等都好大影響。本老hike曾經有個「黑鑽」頭燈,因為太靈敏,次次未入夜已經自動喺袋放電。

4. 流明 (Lumen)

唔係LM唔係留名。依個流明係指光度。

流明最少都要用50以上,否則用肉眼都比佢好,但又唔駛去到1000以上,因為流明越高,耗電量越大,更加會發熱,個人 prefer 200-300 就夠用。

圖片來源

5. 範圍

依點好個人,有啲係範圍好廣,但光度相對比較散,適合行山時用。有啲係集中光度,但範圍就會較細,適合望遠處或要集中精神時用。

最好揀啲可以揀可選擇光線焦距嘅 – 泛光及聚光,就更有彈性。

圖片來源

6. 頭帶

未必係重點,因為絕大部份都可以換。但既然買新,當然揀個比較好。最緊要係個扣唔可以移位,其次係行緊果時會唔會好「浪」,尤其是上落樓梯或高速移動時。

7. 感應開關功能

本老hike極憎依個功能,看似好方便,事實極唔方便,尤其是穿林時,會不斷開關。就算正常使用,除咗係唔駛用手掂到頭燈外,無好處。

8. 色溫

即係咩色光,如: 白光 (色溫6500K左右)、中白光 (色溫4000K左右)、暖白光 (色溫3000K以下)

依度唔將件事複雜化,簡單分: 紅光、黃光、白光:

  • 紅光: 紅光最唔影響其他人,同時又最快令人對眼回復返夜間視力,因為最唔影響瞳孔,一般適合無乜光害地方使用
  • 黃光: 比較柔和無咁刺光,同時對霧及雨水有穿透力。
  • 白光: 三種入面最光,但遇到大霧,可能會俾霧反射到刺眼反而唔清。

至於揀咩光,就個人喜好了。

9. 附加功能

如: 閃爍模式、求救信號、幾段調光等

選購時都需要留意的,其中閃爍模式最為重要,因為有意外可以用佢求救,同時又可以當帶頭時指示後面,實用度都高。

圖片來源

揀到一個啱用嘅頭燈,但都要識用。唔好再水平線用,除非修理緊工具或起營中。

頭燈係要照落地用。如果水平照,就好似popo咁仆街,弱流明還好,成千流明俾你照到嘅人會短暫失明架。

老hike都去camp Facebook專頁
老hike都去camp 網站


文章為作者意見,不代表Fitz立場。

歡迎投稿: http://fitz.hk/contribute/

老hike都去camp
80後老hike一名 對行山、露營有少許認識 Msr fans,極憎nh(世界第一) 為人暴躁,仇口多,方向感差,對攝影、電子科技係屬垃圾級別