户外活動中,成日都會聽到山野無痕 LNT – Leave No Trace,究竟 “LNT” 目的係乜,原意係咩呢?

Leave No Trace 七大原則

  1. 事前充分的規劃與準備
  2. 在可承受地點行走、露營
  3. 適當處理垃圾及維護環境
  4. 保持環境原有風貌
  5. 減低用火對環境衝擊
  6. 尊重野生動植物
  7. 顧及其他使用者

「山野無痕」概念源自美國,喺二戰後很多人到户外活動,有環保組織發現郊外使用率大增,如 campfire 後的痕跡,會對山林做成永久性破壞或影響。於是環保組織開始研究並推廣 LNT,從心態以至行動,教育大眾尊重自然。

山野無痕 LNT 並唔係指要做「環保撚」、「道德撚」,佢嘅原意係要令大自然環境可以持續落去,令到我哋下一代,都可以欣賞到而家嘅環境。所以,不論童軍、民安隊、山藝班等都致力推廣 LNT 嘅文化,咁世世代代都得以享受到大自然。

1. 事前充分的規劃與準備

Planning 的意思,一、要計劃出發路線,預計行幾耐、要準備幾多水、天氣如何、要準備咩裝備,減少意外發生;二、可以 plan 吓餐單,要準備幾多食材,有幾多步驟可事前準備: 去包裝紙、去皮、涮好、自備餐具、膠水樽等,減少垃圾來源,就係最好嘅減廢嘅方法。

延伸閱讀: 事前規劃

2. 在可承受地點行走、露營

避免難民營,因為同一地點太多人使用對環境會做成破壞,另外唔好私自開發營地或行走非現成山徑,個個都咁開,只會令到水土流失,嚴重起上黎,打風落雨時仲有可能山泥傾瀉,到時又少個地方了。

3. 適當處理垃圾及維護環境

自己垃圾自己帶走。帶走意思係帶離郊外,並唔係掉喺垃圾桶就完。

原因係郊外垃圾桶十年都無人清一次,試下將屋企嘅垃圾一個星期唔清,睇吓頂唔頂得順。另外仲會滋生蚊蟲,影響當地衛生,為人為己,請妥善處理自己垃圾。

延伸閱讀: 垃圾處理

4. 保持環境原有風貌

盡可能唔破壞環境,不斬生樹、不採摘樹苗、不倒水泥、不改溪澗水道、不塗鴉,咁樣先可以keep到個營地次次一樣樣。

5. 減低用火對環境衝擊

不燒地,就算要生火都要去返適當嘅地方如焚火台、燒烤爐等。

延伸閱讀: 致燒地撚

6. 尊重野生動植物

野生動物並唔係動物園入面嘅動物,行徑係你預測唔到,更加唔好扮可愛去親近佢哋,因為當佢哋習慣咗唔驚人類時,大家都會有危險。最緊要唔好餵食,當野生動物知道人類係有食物時,人類就會成攻擊目標,金山嘅馬騮、西灣嘅野豬、塔門嘅牛就係sample。保持距離、食物放好就夠了,可以不愛不要傷害。

7. 顧及其他使用者

紮營時,諗下自己會唔會影響到其他人先。入夜後,請將音量收細,因為户外好寧靜,用正常音量傾計,隔30米嘅都可以聽得好清楚的。另外小心頭燈的燈光,你唔係cyclops,唔需要照人對眼架,照地下就夠。

延伸閱讀: 露營禮儀

Leave No Trace 唔係教條,唔係要強制執行,你可以唔認同,亦可以唔信,但唔好話人哋係道德撚,環保撚,只係人哋比你更加愛護大自然,更加想令下一代都可以享受到大自然。

老hike都去camp Facebook專頁
老hike都去camp 網站


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 露營 Camping > [老hike都去camp] 露營知識分享 山野無痕 Leave No Trace