櫈,對大部份 camper 黎講係屬不可或缺嘅裝備,尤其是 hea camp 時。而市場上,淨係一隻H牌都十幾廿款,究竟點選擇先適合自己呢?

選購時,大致上可以留意以下8點:

1. 收納size、重量

櫈喺多項用具入面,個收納 size 係數一數二大舊,所以選擇前先要考慮,你個袋仲有無位放先。重量就唔詳情解釋了,除非你打算一世都搬屋式玩法,不然重量一定係考慮因素之一。

2. 組裝複雜度

從來「越多零件,壞嘅可能性越高」,如果組裝複雜,即代表零件太多,是但壞咗件都可能導致你當日無櫈用,所以唔好揀成隻 Transformer 果啲。

3. 可承受重量

一般户外櫈都會標明可承受幾重,但一般係要自身重量加自己坐落去果下,簡單啲講,個承重最少打八折先啱。另外要留意,櫈最易爛係布嘅車口位,而依個同可承重係無關係的,所以選擇大牌子會安心啲。

4. 櫈背

有背叫椅子,無背叫板凳!唔好坐板凳,仲辛苦過坐地下。而椅子嘅櫈背有長短之分,越長就越重越大舊,同時舒適度都有所提升,可以自行選擇。

5. 座椅高低

高低除咗視乎個人腳長外,仲視乎起身/煮食,太低唔止起身會有困難,連伸直條腰都有難度,但太高又無咁舒服,建議都係自己試一次先。

6. 透氣度

好影響到舒適度,唔透氣會坐到成身汗,但太透氣又驚但背脊涼浸浸,根據自己會玩嘅天氣去選擇,而本老hike好似揀內帳咁,揀半網係最好。因為4季都用得著。

7. 重心穩

一張櫈如重心不穩,切菜時都會驚仆前。向後挨都驚佢反,所以試櫈時,仲要試埋佢穩唔穩。

8. 配件

某牌子櫈仲可以加大量配件如: 寧彩臣天幕、杯架、腳膠等。可按自己需要加裝。

用乜櫈都好,起身後緊記要訓低張櫈,絕大部份人都係貪一時之快無做到,最後燒咗個後欄。

至於咩櫈最好呢……無最好嘅櫈、只有最適合自己嘅櫈,出街試坐多幾張,就知自己想要乜。

老hike都去camp Facebook專頁
老hike都去camp 網站


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 露營 Camping > [老hike都去camp] 露營知識分享 户外櫈