圖: WL

露營都算係用經驗浸出黎嘅一項活動,所以絕大部份人都係會經歷新手依個階段,以下會講下新手常常犯嘅錯誤,睇下自己有無犯過。

1. 將冰箱當雪櫃用

户外冰箱,實際上係叫保溫箱,作用係將箱內嘅野延長冰凍狀態,所以放入保溫箱嘅野,理應全部已經凍嘅野。

如果放一件唔凍嘅野入去,就會將入面全部凍嘅野 share 咗個溫度。打個比喻: 箱內平均溫度為0度,將一支溫度約25度嘅可樂放入去,箱內平均就會提升到8度,連支可樂都係 (非科學數據,比喻而已)

正確要雪凍做法,係靠冰。先將唔凍嘅野放入箱,再加冰,冰會因為要 share 溫度俾其他而溶化,之後再加冰,直到冰唔再溶化。

2. 天幕桿企直

天幕要拉直,發揮到最大面積,天幕桿就需要微斜向外,同時唔會令天幕積水。

3. 食物預備  控制份量

唔知大家有無發覺,每次露完營都會要拎返好多野返屋企,尤其係食材?

露營唔係食自助餐,野炊係好玩,但都要量力而為。建議 set 好餐單後,無得加改,如有特別需要照顧人士,請自備杯麵或乾糧。盡量減少浪費食物,同減少垃圾為前題再去準備食物。

4. 頭燈方向 唔好射面

好多時入夜後,為咗方便自己,會開著個頭燈,即時變咗 X-men入面嘅 cyclops 咁,俾佢望一眼就死。頭燈角度請向下,注意流明度,或用紅光。

5. 未發現蟻巢

可能好多新手未知蟻巢個樣,所以起咗營喺蟻巢上面都唔知,下次可以留意下附近有無先決定位置。

6. 垃圾未有即時處理

尤其是煮食時,垃圾會掉到四圍都係而唔入垃圾袋,小則引致 bee and fly 重則引來 boar or cow。仲影響個觀感。明明野炊為打卡,但卡嘅背後好嘔心。

塔門係露營熱點,成日都有人留低大量垃圾 (網上圖片)

歡迎大家提出仲有咩常見錯誤。

老hike都去camp Facebook專頁
老hike都去camp 網站


文章為作者意見,不代表Fitz立場。

歡迎投稿: http://fitz.hk/contribute/

老hike都去camp
80後老hike一名 對行山、露營有少許認識 Msr fans,極憎nh(世界第一) 為人暴躁,仇口多,方向感差,對攝影、電子科技係屬垃圾級別