今集講下關於買野:

外貌協會

新手最常買野只睇外表,無留意個實用價值,往往買完用過兩三次後就要換。

其實買野之前,可以睇下自己想玩嘅路線,縱走? Car camp? Glamping? 諗清楚後,再做下research,可以慳返好多不必要嘅錢或製造垃圾。

誤信產品描述

依家個年代,好多時都會網上平台購物 (尤其係淘寶),但其實好多時描述個 spec 都係有誤導成份,常見係啲鋁寫住7075但根本只得極少含量、重量同實際不同等。

建議網上購物都係搵返啲有信譽嘅品牌,或睇下有無開箱文先選購。

無留意 packing size

户外用品重量係重要,但 packing size 都好重要,否則100L都未必夠用。
最好都係睇實物,或問清楚收納後嘅大細先決定。

忽視背囊的重要性

新入坑最唔捨得係買背囊,因為一個好少少嘅背囊都四位數字起步,但背囊係直接影響到舒適度、可帶備的裝備數量等。
最好都係去門市上身試試,因為每個人背脊都唔一樣。

延伸閱讀: 背包的選擇

無準備風褸

風褸唔止擋風用,日間防 UV,夜間保暖,仲可以當雨褸用。同埋唔好拆帽,如果太大風、落雨、大霧水時,頂帽好幫到手的。

新手期通常都會買好多唔躉駛嘅小玩具,買之前諗清楚你係需要先買,定係想玩而去買。睇少啲淘寶,睇多啲户外書籍,仲有大把技巧好好玩。

老hike都去camp Facebook專頁
老hike都去camp 網站


文章為作者意見,不代表Fitz立場。

歡迎投稿: http://fitz.hk/contribute/

老hike都去camp
80後老hike一名 對行山、露營有少許認識 Msr fans,極憎nh(世界第一) 為人暴躁,仇口多,方向感差,對攝影、電子科技係屬垃圾級別