又到冬天,又係圍爐取暖嘅好季節。見到唔少人都添置咗燒烤爐,但有冇諗過燒咩炭呢?

注意: 請勿用柴火直接燒嘢食!

因為香港係有有毒嘅柴枝,仲有,柴嘅表面係有機會痴住有毒嘅物質,當一受熱,就會彈起痴住喺食物度,所以都係乖乖地用炭啦。

炭一般分: 木炭、菊花炭、椰子炭、備長炭等

木炭

木炭當中又有分咩木做出黎嘅炭,如: 荔枝炭、竹炭、紅樹炭、龍眼木炭、炭精等。

1. 荔枝、龍眼木

以上兩隻效果差不多,不過龍眼木一般會比較大舊,荔枝木就比較細長。因為明火關係,燒出嚟效果好有風味。

2. 紅樹木

紅樹木質地比較脆,耐燒度同溫度都不及荔枝&龍眼木,仲會出好多白煙,唔係貪平都唔會買。

3. 竹炭

竹炭因為耐燒度低,所以一般都唔會用黎燒烤,不過竹炭係一個好好嘅木炭。佢除咗可以放喺室內吸濕用,仲可以用黎做 filter 去水味,及清潔牙齒用,有啲似備長炭。

4. 炭精

唔係買蜜糖送嘅炭精,係一種「機製木炭」。

炭精完全無煙、無味、耐燒、燃燒溫度十分穩定,但因機械壓縮製作,所以密度十分高,要燃點係有難度,所以用時有啲技巧,一係火鎗,一係先起柴火再燒著佢,不過炭精好耐燒,帶一盤就已經可以玩一日。

椰子炭

天然椰子殼纖維壓縮燒製而成,環保、易燃、小煙、低溫。不過好快燒完,都係留返黎食水煙好了。

菊花炭

菊花炭唔係菊花做,係因為個橫切面係菊花形狀。菊花炭耐燒、少煙、燃點低,所以都係主流炭之一。

備長炭

其實都係木炭一種,不過佢係屬於「白炭」

備長炭質地相當硬,耐燒,溫度高,但又唔同一般木炭會有明火&白煙。可惜價錢有啲貴,比較少用。

炭火雖然無柴火咁有味道,但喺安全性,耐用性方面,就高得多了,下次玩火時,不妨試吓其他炭。

老hike都去camp Facebook專頁
老hike都去camp 網站


文章為作者意見,不代表Fitz立場。
歡迎投稿: http://fitz.hk/contribute/
老hike都去camp
80後老hike一名 對行山、露營有少許認識 Msr fans,極憎nh(世界第一) 為人暴躁,仇口多,方向感差,對攝影、電子科技係屬垃圾級別