本老 hike 早十年前成日叫朋友露營,不過9成朋友都會用無得沖涼黎 reject,就算講咗係有得沖都無人聽….十多年後,露營變咗個熱潮,好多人為咗玩,可以涼都唔沖 or 抹一抹個身就算。冬天都還好,熱天點頂? 所以今次講下户外沖涼點做。

1. 營地選擇

  • 有部份營地係設有公共浴室,例如: 西貢灣仔、大嶼山貝澳
  • 有部份就有士多提供收費的沐浴房,例如: 鹹田
  • 更可以去收費場,就要乜有乜

2. 直立營 & 泳衣

唔想俾場地局限自己去嘅位置,就要有心理準備要喺户外沖身。唔怕麻煩就可以拎直立營做一個私家浴室,怕就要準備泳衣沖涼用 (沙灘游完水都係泳衣沖涼,唔駛怕醜)

但 set 位都需要注意,要遠離水源30呎以上,以免流入水源內。最好搵到微斜位,做成去水,咁水就唔會積成氹。

3. 花灑系統

依家户外已經有多種工具係 for 沖涼的。例如:

Camp shower

  • 最傳統嘅黑色水袋,原理係曬熱佢之後就有熱水沖涼
  • 其實啲水都熱得好舒服下,不過要搵高位掛,同可能需要上到繩結,所以少人用了

腳踩pump

用腳 pump 水上花灑沖涼,可加入熱水,效果不錯,俾想像中用少力,可以無視地形使用,packing size 一般,唔算大。

電pump

腳 pump 進化版,用電推動,亦可加入熱水,真係家一樣的感覺,可惜,重、大舊。

茶壺

一個最易控制自己用水量嘅方法,煲水後加入凍水為佳,不過要多加練習先可以練成此大法。

噴壺

比想像中用水多,效果差,仲要人幫手添,唔好試。

4. 洗頭水、護髮素、沐浴露

茶籽粉
  • 因為户外沖涼,如果用到化學成份嘅,又會破壞到草地,唔用又唔乾淨
  • 依個時候,我推薦茶籽粉,一開始個感覺係好怪,又覺得好似啲泥喺個身上面咁。習慣之後就無乜野,仲係全天然成份,唔會破壞環境,忍下啦

5. 毛巾

應該無人用大毛巾咁癲掛? 用游水巾最好最吸水,係第一下有啲痛。

6. 吹頭

知道有女仕頭濕係好煩,可以試下用 max pump 吹乾佢,效果唔錯的。

其實户外沖涼係比想像中易,不過可能好多人唔習慣無遮掩嘅情況下沖涼 (去完沙灘都係咁沖…..) 只要突破到個心理障礙,其實沖涼都唔難解決。

老hike都去camp Facebook專頁
老hike都去camp 網站


文章為作者意見,不代表Fitz立場。

歡迎投稿: http://fitz.hk/contribute/

老hike都去camp
80後老hike一名 對行山、露營有少許認識 Msr fans,極憎nh(世界第一) 為人暴躁,仇口多,方向感差,對攝影、電子科技係屬垃圾級別