露營,其實同玩車好似。有人玩會越野車,有人玩會吉普車,有人會玩跑車,有人又會玩貨車。啱啱玩車時,會平平地買架二手日本車入左場先,之後見到人地用其他車,就自然會想轉會。露營都係咁上下,但如果晌入場之前,了解到自己嘅方向,晌未來買裝時,都會慳返唔少。

所以今日講下香港常見既 camping style,睇下自己鍾意邊隻既同時,又可以朝住該方向買gear or 選擇入咩谷。

1. Glamping

Glamorous + Camping 合併而成既字,豪華露營既意思。

玩法偏向重裝,配備大量 decoration,將營地裝飾一番,食方面都比較豪華,住方面都比較舒適,通常會配合手拉車搬運或車輛直到既營地,所以比較有限制。

2. 車中泊

車中泊係來自日本,晌日語既意思就係「車中住宿」,即係直接車上過夜。本身車中泊既意思係一黎可以慳返酒店錢,二黎舒服過住露營。所以正確黎講,車中泊係唔屬於露營既一部份的。不過會用上大量露營gear,近來都視為 camping 之一。

車中泊因為會喺車入面,一般裝備如床、露營燈、枱櫈等都不是問題,甚至配置雪櫃,電視都大有人在,只需要將車輛改裝就得,不過要小心觸犯法例。

3. Backpacker

背包客一詞,唔單止喺露營界出現,旅遊界都成日見到。而晌 camping 入面,Backpacker 會選擇孭住個背囊,步行一段路去到營地,再靜靜地過一晚。

Backpacker 一般會比較輕裝或用上輕量化裝備,裝備亦以實用性為主,務求去到目的地,欣賞當地風景。

4. Hardcore camper

通常會玩啲比較 extreme 的 camping,例如長距離攀岩去 camp、游水去 camp、爬艇去 camp 等非一般常規性的露營。Hardcore camper 對裝備、知識、技術等都有一定水平,遇到時不妨可以取取經。

了解咗自己想玩 style,就搵同 type 嘅師兄請教裝備或營地,咁就小啲磨擦同慳唔少錢。

最後,玩咩 style 都好,請保持應有嘅禮儀、緊守山野無痕7大原則、自己垃圾,自己帶走。

老hike都去camp Facebook專頁
老hike都去camp 網站


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 露營 Camping > [老hike都去camp] 露營經驗分享 香港露營風格 Hong Kong Camping Style