睇《家有壁爐》不如睇戶外焚火爐

亞視永恒,佢哋曾經製作過經典節目《娛樂無窮》,影住幾條金魚游來游去,仲係全球首創。早幾年,N記串流平台又有《家有壁爐》大受歡迎。有人將呢啲節目歸類為「慢電視」(Slow TV) ,話都市人生活緊張,電視節目都可以提供放空嘅機會喎。

鍾意戶外活動嘅話,又想睇電視放空,不妨睇下呢個 Youtube Channel。

主理人大叔叫 Nate,來自美國俄勒岡州,佢個 channel Hike Camp Climb,訂閱人數得三十萬唔夠,比起香港本土受歡迎嘅 KOL,下下過百萬相差好遠。而且,Channel 影片數目亦唔多,只係得22條片,不過好多條嘅瀏覽量郁下都過百萬,最勁嗰兩條分別係900萬同1400萬。

大叔嘅裝備好簡單,絕對唔豪華。大風雪下嘅營幕都好單薄。

大叔嘅熱門短片以 YouTube 來說相當長,有成半個鐘,而且內容來來去去都係一個模式:

1. 單拖孭住個大背囊,搵到森林一塊平地,作為營地
2. 平整營地,將地下嘅雪地或泥地整好

3. 搭營
4. 找尋枯樹,然後斬樹,作為搭建營幕支架,或用嚟當柴燒

5. 搭焚火爐,取暖、煮飯之用
6. 煮嘢食,食飯

7. 天黑,瞓覺
8. 天光,煮早餐,食早餐
9. 拆營、拆爐
10. 收拾裝備,清理營地
11. 走人

佢受歡迎嗰幾條短片,一句說話都無,而佢嘅露營活動相當無聊,煮嘅嘢食又超級簡單,佢又唔會影下山上壯麗嘅景色。好多時你唔知自己睇緊乜,不過就好似望住 Netflix 個壁爐,又或者睇實亞視嗰幾條金魚,都可以帶畀你治癒感覺。

香港嘅營地都唔知要封到幾時,睇下片望梅止渴,都不失係一個好方法。


文章為作者意見,不代表Fitz立場。
歡迎投稿: http://fitz.hk/contribute/

⮑ YAS BYKE 踩車保 保障全港所有單車可行走的公路,任何想踩車的地點都可受到保障,覆蓋更加全面! 作為 YAS 的合作夥伴,Fitz。 讀者可享有限時1次 BYKE Pro 完整體驗! 把握機會為自己加添一份更全面的保障! 了解更多 BYKE Pro 詳情,請瀏覽此
首頁 > 運動 Sports > 行山 Hiking > 露營 Camping > 露營版《魚樂無窮》.大叔零對白露營片吸千萬view超治癒