水,係露營活動中不可或缺嘅東西。如果露營地點近水源,都可以用器皿甚至需要用水時先直接去拎水,但如果水源係有一段距離嘅,水袋可以算係必要用品,而水袋有平有貴,仲有好多款式,究竟邊隻先適合自己呢?

揀水袋需要留意嘅地方有: 使用物料、容量、款式、出入水口大細、收納、耐用性、方便使用等。

水袋裝造物料: 塑膠

水袋通常都係用塑膠造 (就算 MSR 嘅強化尼龍內都係塑膠黎),所以認知塑膠分類係非常重要,而常見用於水袋嘅塑膠如下:

PVC「聚氯乙烯」

中文名「聚氯乙烯」塑膠分類標誌為3號,因為佢價錢平、可塑性高,所以喺日常生活非常之常見,水袋都唔例外。不過佢亦都被譽為「最大獲」嘅塑膠,因為佢會釋放有毒甚至致癌物質,少用為妙。

PC「聚碳酸酯」

中文名「聚碳酸酯」塑膠分類屬於other,標誌為7號,常見用於水樽,一般使用無乜大問題,但唔好俾太陽曬同埋裝熱水,因為會釋放有毒物質。

以上兩款其實都非常唔適合製作成水袋,另外以下一款更加要小心。

食用級PE「聚乙烯」

PE 本名「聚乙烯」,而PE本身係有兩隻 – 標誌為2嘅 HDPE「高密度聚乙烯」同標誌為4嘅 LDPE「低密度聚乙烯」。雖然兩者都係叫PE,但用途有好大分別。

  • 4號嘅 LDPE,雖然無之前兩款嘅有毒問題,但耐水性同耐熱性都好低,勝在透明度高,所以通常只適用於製成膠袋用。
  • 2號嘅 HDPE就正正相反,又唔透明,硬度又高,但耐水性同耐熱性都非常出色,又無有毒物質問題,所以好多果汁都會選擇2號黎做容器。

但有好多無恥商人,用食用級PE眼字,將 LDPE 扮 HDPE,其實真係 HDPE,又何須用「食用級」黎表達呢? 所以大家要小心。

容量

水袋容量用L做單位,而每L水大約重1kg,所以可以因應個人體能、場合所需等選擇容量。

水袋款式

水袋款式非常之多,以下會分享下常見款式使用心得

方形水袋

屬硬膠水袋,可摺疊收納,摺得多個角位會漏水,勝在夠硬淨,fill 滿水都尚算好拎,但需要放晌枱或高架上先可以好好使用。

方形進化

屬軟膠水袋,收納方法同方形一樣,軟身既設計令佢冇上面果隻咁易爛,更因為咁,可以晌地下使用,但換黎就係fill滿水之後極度唔好拎,個重量會聚左埋一邊。

直身水袋

屬軟身水袋。可以捲起收納,但因為軟身膠既關係,放低時要輕力否則好易爆開。需要掛起使用。

風琴式水袋

屬軟身水袋,收納相當方便,又可以晌地下使用,但fill滿水後極度唔好拎。

袋形水袋

屬硬身水袋,要摺疊收納,因為有兩個出水口關係,所以地下或枱上使用都方便,同時上面係使用28mm既出水咀,所以有部份品牌filter都可以直接使用,唯最大儲水量唔高。

Evernew EBY

利用 Nylon 混合 PE 製成,所以可以隨便摺疊收納,亦因為咁硬淨度非常可信,設計上係手上使用,配有28mm出水口,可以 filter 直出,封頂更可以打開方便清潔或fill水用,唯最大儲水量唔高。

>

MSR dromedary

Nylon + HDPE 製成,唔單止可以隨意收納,強化尼龍既外表更可以隨便使用。使用地方亦唔需要有限制,而水袋本身係背帶,所以fill滿水後可以當背囊咁孭上身。而出水口有三個,大口方便 fill 水,中口係28mm*出水咀,可以直入 filter 使用,細口可控制使用水量,沖涼洗手一流。

*個28mm好似有偏差,直入有少少漏水現象

建議盡可能買個好啲既水袋,唔好再用屈xx既4.5L水樽,一黎好唔環保,二黎又貴,買到一個好既水袋,基本上係可以跟你一世的。

老Hike都去camp blog


文章為作者意見,不代表Fitz立場。
歡迎投稿: http://fitz.hk/contribute/

⮑ YAS HYKE 行山保 保障範圍涵蓋全港所有山野及行山徑,5程僅需$75 (Fitz 讀者優惠$50/5程),便享有意外醫療、財物以及身故賠償等保障,合共保額超過HK$300,000。
首頁 > 運動 Sports > 行山 Hiking > 露營 Camping > 露營知識分享: 水袋